Azərbaycan, Bakı, 10 noyabr / Trend , müxbir İ.Əlizadə/ Azərbaycan nüvə terrorçuluğuna qarşı mübarizə üzrə beynəlxalq Konvensiyaya xüsusi şərtlə qoşulacaq.
"Rəsmi Bakı Ermənistanın işğalı alıtında olan Azərbaycan ərazilərində bu Konvesiyanın tətbiq olunmasına təminat vermir və həmin ərazilərdəki vəziyyətə görə məsuliyyət daşımır", - bu barədə bazar ertəsi Trend -a parlamentin Təhlükəsizlik və müdafiə məsələləri daimi komissiyasının üzvü, deputat Zahid Oruc məlumat verib.
Trend -un məlumatına görə, komissiyanın bazar ertəsi keçirilən iclasında Azərbaycanın nüvə terrorçuluğuna qarşı mübarizə üzrə beynəlxalq Konvensiyaya qoşulması məsələsinə baxılıb.
Trend -un arayışı: Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk qrupu vasitəçilik edir.
Deputatlar bildiriblər ki, Ermənistan tərəfindən işğal olunan Azərbaycan torpaqlarında nüvə və radioaktiv tullantılar, o cümlədən "Metsamur" AES-in tullantıları basdırılır və həmin ərazilər həyat üçün təhlükəli bölgəyə çevrilib: "Ona görə də Azərbaycan belə Konvensiyalara qoşulan zaman bu məsələləri qaldırmalı və sənədə daxil edilməsinə çalışmalıdır".
Oruc qeyd edib ki, Konvensiya nüvə elementləri və materiallarının yayılmamasına qarşı mübarizə üzrə müxtəlif ölkələrin öz üzərlərinə götürdükləri öhdəlikləri əks etdirir: "Çox mühüm sənəddir və Azərbaycanın ora qoşulmasının böyük əhəmiyyəti var".
Komissiya qanun layihəsini təsdiqləyib və parlamentdə müzakirəyə çıxarılmasını tövsiyə edib.
Məqalə müəllifi ilə əlaqə ünvanı: [email protected]
