Azərbaycan, Bakı, 27 noyabr/ Trend / Ərəb Dövlətləri Liqasının (ƏDL) xarici işlər nazirləri Qəzzə Zolağı əhalisinə kömək üçün, təcili surətdə ərzaq və tibbi yardımın göndərilməsi haqqında qərar qəbul ediblər.
Bu qərar ƏDL - in cümə axşamı təşkilatın Baş katibi Əmr Musanın rəhbərliyi altında Qahirədə keçirilən iclasında qəbul edilib, - "Əş-Şərq Əl-Ausat" ərəb qəzeti cümə axşamı yazır.
Ərəb ölkələri Misir hökumətinin yardımı ilə, Misirlə sərhəddə Rəfah NMB vasitəsilə Qəzzə Zolağına humanitar yardım göndərəcəklər.
Ərəb XİN rəhbərləri Fələstin Milli Administrasiyasının rəhbəri Mahmud Abbasa HƏMAS hərəkati ilə danışıqları davam etdirməyi, Fələstində seçkilərədək barışıq sazişi imzalamağı təklif ediblər.
ƏDL görüşünün iştirakçılarından biri - Səudiyyə nümayəndə heyətinin rəhbəri Əmir Feysəl bəyan edib ki, ərəb ölkələri Fələstin dövlətinin daxilində parçalanmanın dərinləşməsinə yol verməmək üçün, əllərindən gələni etməlidirlər. Onun sözlərinə görə, administrasiya daxilində fikir ayrılıqlarından yeganə fayda qazanan İsrail olacaq.
Suriya XİN-in rəhbəri Valid Əl-Müəllim Fələstin Administrasiyasından Fələstin qanunvericiliyinə əməl etməyi və HƏMAS - ı qarşıdakı seçkilərdə iştiraka buraxmağı tələb edib. Sudan və Qətərin nümayəndələri isə, HƏMAS - ın bu iclasda iştirak etməməsi ilə bağlı narahatlıqlarını ifadə ediblər. Fələstin nümayəndə heyətinin rəhbəri Saib Arikat buna cavab olaraq bildirib ki, bu iclas Fələstinin bütün fraksiyalarının iştirakını nəzərdə tutmur.
Müəlliflə əlaqə saxlamaq üçün elektron ünvan: [email protected]
