Azərbaycan, Bakı, 28 noyabr / Trend , müxbir Ü. Sadıqova/ Fələstində daimi atəşkəs rejimi yaranmayınca, beynəlxalq təşkilatlar Qəzzə Zolağı mühasirəsinin götürülməsi üçün İsrailə təsir göstərə bilməzlər.
"Qəzzənin mühasirəsi HƏMAS - la İsrail arasında ümumi problemin bir hissəsidir. Bu səbəbdən də, nə Qərb, nə ərəb, nə də islam dünyası bu məsələnin həllində təzyiq göstərməyə qadirdir", - Amerikanın Fələstin üzrə işçi qrupunun prezidenti (The American Task Force on Palestine (ATFP) Ziyad əl - Asali (Ziad al Asali) Trend -a elektron poçtla bildirib.
Noyabrın ilk günlərindən, TSAXAL ordusu ilə HƏMAS hərəkatı üzvləri arasında atəşkəs pozulandan sonra İsrail hökuməti Qəzzə Zolağının mühasirəsinə başlayıb.
BMT-nin Baş katibi İsraildən yaxın müddətə mühasirəni götürməyi tələb edib.
HƏMAS - la İsrail arasındakı münaqişənin uzun tarixi var və tərəflər arasında budəfəki mübahisənin həllində əsas problem 2006 - cı ilin yayında HƏMAS -ın əsir götürdüyü israilli hərbçi Gilad Şalitin qaytarılması ilə bağlıdır, - Asali belə hesab edir.
Onun sözlərinə görə, Fələstinin hakim FƏTH partiyası ilə HƏMAS müqavimət hərəkatı arasında bölgədə strateji əməkdaşlıq barədə vahid sənəd hazırlamayınca, Qəzzə Zolağı həmişə İsrail tərəfdən təhlükəyə məruz qalacaq.
"Fələstin hökuməti rəhbərləri ilə HƏMAS -ın xarici siyasi böhrandan çıxmaq üzrə vahid strateji planları yoxdur", - əl-Asali söyləyib.
Onun sözlərinə görə, belə planın olmaması böyük riskdir, çünki digər Fələstin partiyaları da İsraillə münaqişəyə və daxili-siyasi ixtilaflara cəlb oluna bilərlər.
HƏMAS -ın Qəzzə Zolağını nəzarətə götürməsi Fələstindaxili paraçalanmanı daha da dərinləşdirib və Fələstin bu gün coğrafi cəhətdən parçalanmış bölgəni xatırladır, - əl-Asali bildirir.
Asalinin fikrincə, bu fikir ayrılıqlarını iki yolla - güc yolu ilə - bu, bölgə üçün optimal deyil - və ya muxtariyyətə yeni rəhbər seçməklə həll etmək olar.
Bütün Fələstin partiyaları 2010 - cu ilin yanvarınadək Qanunverici Şuraya seçkilər keçirməyincə, Qərb Sahili və Qəzzə Zolağı müxtəlif siyasi qruplaşmaların nəzarətində olacaq, - Asali belə hesab edir.
"Fələstinin milli hökuməti Qəzzənin siyasi həyatında iştirak edərsə, Qəzzə Zolağı əhalisinin həyatı yaxşılaşa bilər ", - Asali deyib.
Onun fikrincə, Qəzzə Zolağı HƏMAS -ın tam tabeliyində olmazsa, yaxşılaşma baş verə bilər.
Asali hesab edir ki, muxtariyyət rəhbərliyinə 2009 -cu ilin yanvarında keçiriləcək yeni seçkilər Fələstin siyasətində dəyişilik etməyəcək, çünki yalnız Mahmud Abbasın səlahyyət müddəti bitir.
Fələstin qanunvericiliyinə görə, muxtariyyət rəhbərliyinə və Qanunverici Şuraya seçkilər eyni vaxtda - 2010 - cu ilin yanvarında keçirilməlidir. Bu səbəbdən də, əl- Asalinin rəyinə görə, Fələstinin daxili siyasətində dəyişikliklər məhz bu mərhələdə baş verə bilər.
Qərb təşkilatlarının İsrail-Fələstin problemilə bağlı fəaliyyətinə gəlincə, onların işi səmərəli deyil, çünki bu fəaliyyət Yaxın Şərqdə siyasi hadisələrin gedişinə uyğun deyil, - al Asali hesab edir.
"Fələstin və İsrail probleminin həllilə hələlik yalnız hakim məşğul olur" - Amerikanın Fələstin üzrə işçi qrupunun prezidenti vurğulayıb.
Müəlliflə əlaqə ünvanı: [email protected]
