Azərbaycan, Bakı, 27 fevral / Trend , müxbir A.Hüseynbala / Azərbaycanın müxalifət partiyasının sədrliyinə namizəd qurultayın keçirilməməsinin səbəbinin yerlə bağlı olduğunu deyib.
"Konstitusiyaya əlavə və dəyişikliklərlə bağlı referenedumun təyin edilməsi də qurultayımızın ləngiməsinə təsir göstərib", - cümə günü Trend -a Azərbaycan Milli İstiqlal Partiyasının (AMİP) mətbuat və təbliğat katibi, sədrliyə namizəd Əli Orucov bildirib.
Тrеnd Nеws-un аrаyışı: AMİP-in ötən ilin əvvəlindən qurultay keçirmək cəhdləri baş tutmur.
AMIP-in keçmiş sədri Ayaz Rüstəmov 2007-ci ilin sonunda vəzifəsindən istefa verib. AMIP-ə yeni sədr seçmək üçün partiyanın fövqəladə qurultayı keçirilməlidir. Sədrliyə üç nəfər iddia edir - partiyanın Nərimanov rayon təşkilatının sədri Ələddin Əsgərov, Goranboy rayon təşkilatının sədri Fəqan Məhərrəmli və AMIP-in təbliğat və mətbuat katibi Əli Orucov.
Orucovun sözlərinə görə, qurultayın bu il ərzində keçiriləcəyi istisna olunmur.
"Bununla belə, mən tədbirin konkret hansı ayda baş tutacağını deyə bilmərəm", - partiyanın funksioneri əlavə edib.
AMİP-in katibi deyib ki, indiyədək qurultay keçirilib sədr seçilməməsinə Bakı Şəhər İcra Hakimiyyətinin yerlə bağlı müraciətlərinə müsbət cavab verməməsi səbəb olub. "Bizə nə Şəhriyar adına Mədəniyyət Mərkəzində, nə də Rəşid Behbudov adına Mahnı Teatrında qurultay keçirməyə razılıq verilməyib. Özəl yerlərin sahibləri isə müxtəlif bəhanələrlə müraciətlərimizi rədd ediblər", - Orucov vurğulayıb.
Partiya rəsmisi, qurultayın sədrliyə namizədlərin AMİP-in lideri tərəfindən qəbul olunmaması səbəbindən yubandığını təsdiqləməyib.
"Etibar Məmmədov ümumiyyətlə, bu prosesə müdaxilə etmir. Digər tərəfdən, namizədlərin hamısı partiyada kifayət qədər tanınırlar, onlar fəaliyyətləri ilə bu yerə layiq olduqlarını sübut ediblər", - Orucov deyib.
АMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Ondan sonra AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gediblər.
Etibar Məmmədov hazırda Beynəlxalq Demokrat İttifaqının üzvüdür.
Məqalə müəllifi ilə əlaqə ünvanı:[email protected]
