Azərbaycan, Bаkı, 19 may / Trend , müxbir A.Hüseynbala /
Azərbaycanın bir neçə müxalif partiyasının təmsil olunduğu blokun bələdiyyə seçkilərində iştirakı məsələsi hələ dəqiqləşdirilməyib.
"Bloka üzv olan partiyaların hər biri bələdiyyə üzvlüyünə namizədləri müəyyənləşdirəndən sonra, ümumi müzakirə aparıb konkret qərar qəbul edəcəyik", - çərşənbə axşamı Trend -a "Azadlıq" blokunda təmsil olunan Vətəndaş və İnkşaf Partiyasının (VİP) sədri Əli Əliyev bildirib.
Trend -un arayışı: Azərbaycanda bələdiyyə seçkisi 2009-cu ilin sonunda, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Əliyevin sözlərinə görə, "Azadlıq" blokuna daxil olan partiyalar "Qarabağ və Respublika Uğrunda Hərəkat"da təmsil olunduqlarından seçkilərdə iştirak məsələsində bir sıra problemlər yaranır. "Seçkilərdə blok şəklində iştirak etmək üçün əvvəlcə maliyyə problemini həll etmək lazımdır. Bundan əlavə, qanunvericilikdəki bəzi müddəalar da partiyaların seçkilərdə blok kimi iştirakı məsələsinə maneələr yaradır", - VİP sədri əlavə edib.
Onun fikrincə, indidən istər blokda, istərsə də hərəkatda təmsil olunan partiyaların bələdiyyə seçkilərində hansı formada iştirakı ilə bağlı qəti mövqe bildirmək mümkün deyil. "Referendumla bağlı yaradılıan hərəkatın da bloka çevrilməsi müzakirə olunur. Bu proses hər bir pariyanın namizədləri müəyyənləşəndən və ümumi müzakirələrdən sonra yekunlaşacaq", - Əliyev vurğulayıb.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
"Azаdlıq" blokunda üç müxаlifət pаrtiyаsı - Аzərbаycаn Xаlq Cəbhəsi (АXCP), Libеrаl (АLP), Vətəndаş və İnkişаf (VİP) pаrtiyаlаrı təmsil оlunur.
Məqalə müəllifi ilə əlaqə ünvanı: [email protected]
