Azərbaycan, Bakı, 24 iyun / Trend , müxbir S.Ağayeva /
Azərbaycan və Küveyt iqtisadi əməkdaşlığı genişləndirmək niyyətindədirlər.
Küveytin Baş naziri şeyx Nasser Məhəmməd əl-Əhməd əs-Sabah Bakıya səfəri çərçivəsində Azərbaycan hökuməti ilə iki ölkə arasında əməkdaşlıq perspektivlərini müzakirə etməyi planlaşdırır. Bu barədə Trend -a Azərbaycanın Küveytdəki səfiri Şahin Abdullayev bildirib.
"Dəvət artıq çatdırılıb, səfər isə payıza planlaşdırılıb", - deyə səfir bildirib.
Bakıda keçiriləcək danışıqlarda əsas diqqət Azərbaycan layihələrinə Küveyt investorlarının cəlb olunması məsələsinə ayrılacaq.
"Küveytin iş adamları artıq Azərbaycana maraq gösətərirlər, onların ölkədə fəaliyyət göstərməsi üçün əlverişli şərait yaradılıb", - deyə diplomat bildirib. Səfirin sözlərinə əsasən, dövlətlər arasında hüquqi baza yaradılıb. Azərbaycan Prezidenti İlham Əliyevin Küveytə rəsmi səfəri zamanı investisiyaların təşviq edilməsi və qarşılıqlı müdafiəsi haqqında müqavilə, eləcə də ticarət və turizm sahələri də daxil olmaqla beş müqavilə imzalanıb.
"Bu gün hər iki ölkə tərəfindən bir neçə investisiya layihələri nəzərdən keçirilir", - deyə səfir bildirib.
Azərbaycanın Dövlət Statistika Komitəsinə əsasən, 2009-cu ilin yanvar-aprel ayları ərzində Azərbaycandan Küveytə ixrac 336,1 min dollar təşkil edib. İdxal əməliyyatları həyata keçirilməyib.
Məqalə müəllifi ilə əlaqə ünvanı: [email protected]
