Azərbaycan, Bakı, 16 sentyabr / Trend , müxbir C.Babayeva /
Azərbaycanın Yaşıllar Partiyasının (AYP) üzvləri bələdiyyə seçkisinə fərdi qaydada qatıla bilərlər.
"Seçkiyə qatılmaq üçün blokun yaradılması ilə bağlı Ümid Partiyasından müsbət cavab alınmasa, partiyanın üzvləri fərdi qaydada seçkiyə qatılacaq. Təcrübə qazanmaq üçün partiyanın 150 üzvü seçkiyə qatılmaq niyyətindədir", - çərşənbə günü Trend -a AYP əsdri Mais Güləliyev bildirib.
Trend -un arayışı: Azərbaycanda bələdiyyə seçkisinin dekabrın ortalarında keçirilməsi gözlənilir.
Onun sözlərinə görə, Ümid Partiyası bir həftə ərzində əməkdaşlıq barədə sənədin hazırlanacağını bildirsə də, cavabı gecikir. "Ümid Partiyasından müsbət cavab alınandan sonra digər partiyalarla əməkdaşlıq haqqında danışıqlar aparmağa ehtiyac qalmayacaq. Azərbaycanın siyasi partiyaları öncə addım atıb, sonra başqa fikrə düşürlər. İnanmıram ki, Ümid Partiyasının rəhbərliyi sözlərinə qeyri-ciddi yanaşsın", - Güləliyev deyib.
AYP sədrinin fikrincə, bələdiyyə strukturlarının səlahiyyətləri o qədər azdır ki, bələdiyyə seçkisində geniş miqyasda iştirak edib enerji sərf etməyə dəyməz. "Partiyamız təklif edir ki, yerli icra hakimiyyəti orqanları ləğv edilsin. Bələdiyyə və icra hakimiyyəti orqanları iki eyni idarəetmə qurumudur. Onlar bir-birlərinin fəaliyyətini təkrarlayırlar. Bələdiyyələr dövlət büdcəsindən ayrılan kifayərt qədər vəsaiti lazım olmayan istiqamətlərə xərcləyən "parazit quruma" çevrilib", - Güləliyev deyib.
Məqalə müəllifi ilə əlaqə ünvanı: [email protected]