Azərbaycan, Bakı, 16 oktyabr / Trend , müxbir A..Hüseynbala/
Azərbaycanın müxalifət partiyası məcburi köçkünlərin bələdiyyə seçkilərində iştirakının təmin olunması üçün Mərkəzi Seçki Komissiyasına müraciət edib.
"Səs vermək hüquqna malik on minlərlə Azərbaycan vətəndaşı olan qaçqın və məcburi köçkünün prosesdən kənarlaşdırılması seçki aktivliyinə mənfi təsir göstərə bilər", - cümə günü Trend -a Azərbaycan Liberal-Demokrat Partiyasının (ALDP) mətbuat xidmətindən bildirilib.
Trend -un arayışı: Azərbaycanda bələdiyyə seçkisi dekabrın 23-də keçiriləcək. 1718 bələdiyyəyə 15682 bələdiyyə üzvünün seçilməsi nəzərdə tutulur.
Azərbaycanda bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
MSK məcburi köçkünlərin ərazilərinin işğal altında qalmasını və orada yerli özünüidarəetmə orqanlarının olmamasını nəzərə alaraq onların seçkidə iştirakını mümkün hesab etmir. "Lakin onların Azərbaycan vətəndaşı olmaları və müvəqqəti məskunlaşdıqları yerdə qeydiyyata düşmələrini nəzərə almaq lazımdır", - məlumatda vurğulanır.
Partiya rəhbərliyinin fikrincə, əgər məhz bu prosesdə məcburi köçkünlərin səs vermə və seçilmək hüququ əllərindən alınırsa, onda müvafiq dairə seçki komissiyalarının saxlanması da məntiqsizdir. "Ötən parlament seçkilərində işğal olunmuş ərazilərdən Milli Məclis üzvlərinin seçilməsi ilə MSK-nın məlum qərarı arasında ziddiyət var", - məlumatda əlavə olunur.
Problemin həlli üçün ALDP MSK-ya müraciət edərək qərara yenidən baxılmasının xahiş edib.
АLDP 1999-cı ildə yaradılıb. 2000-ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh Ibadov və Fuad Əliyev hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.
Məqalə müəllifi ilə əlaqə ünvanı: [email protected]
