Azərbaycan, Bakı, 4 noyabr / Trend , muxbir K.Zərbalıyeva/
Sumqayıt şəhərinin nümayəndə heyəti Belçikada səfərdədir.
Sumqayıt Şəhər İcra Hakimiyyətindən çərşənbə günü Trend -a verilən məlumata görə, səfər Avropa Komissiyasının Energetika və Nəqliyyat üzrə baş direktorunun müavini Fabrisio Barbasonun dəvəti ilə baş tutub.
Noyabrın 3-dən 5-dək davam edəcək səfər çərçivəsində nümayəndə heyəti Avropa Komissiyasının "Merlər Sazişi" adlı təşəbbüsünə həsr olunmuş ilk iclasda iştirak edəcək. Yığıncaqda təşəbbüs haqqında iştirakçı ölkələrə ətraflı məlumat veriləcək, tərəflər arasında fikir mübadiləsi aparılacaq.
Avropa Komissiyası 2008-ci ilin fevral ayında yerli idarəetmə orqanlarının karbon qazının azaldılmasında rolunun gücləndirilməsini nəzərdə tutan "Merlər Sazişi" adlı təşəbbüslə çıxış edib.
"Merlər Sazişi" təşəbbüsü cari ildə Azərbaycanın da iştirakçısı olduğu yeni tərəfdaş ölkələr ilə Avropa İttifaqı arasında imzalanmış "Şərq tərəfdaşlığı" proqramının prioritet tədbirləri siyahısına daxil edilib. Hazırda bu təşəbbüsə Qərbi və Şərqi Avropanın 800-dən çox şəhəri qoşulub.
Məqalə müəllifi ilə əlaqə ünvanı: [email protected]
