Azərbaycan, Bakı, 21 iyun /Trend, müxbir R.Hafizoğlu/
İsrail Parlamentinin ərəb deputatları "erməni soyqırımı" adlandırılan qətnamənin tanınmasının əleyhinə səs verəcəklər. Bu barədə Knessetin ərəb bloku - Milli Demokratik Birliyindən olan deputatı xanım Hənin Zəəbi deyib.
"Ərəb deputatlar yekdilliklə bu sənədə qarşı çıxış edəcəklər", - Trend-ə telefonla Zəəbi bildirib.
Knessetin Xarici əlaqələr və müdafiə komitəsi İsrail Parlamentində "erməni soyqırımı"nın tanınmasını gündəliyə çıxarmaq niyyətindədir. Həmin sənəd aprelin sonunda sol partiyaçılar fraksiyasının təşəbbüsü ilə təqdim edilib.
"Soyqırım" Türkiyə və İsrail münasibətlərinin kəskin pisləşməsi fonunda müzakirə ediləcək, münasibətlər mayın 31-də İsrail Hərbi Dəniz Qüvvələrinin Qəzza bölgəsinə humanitar yardım aparan "Azadlıq donanması"na etdiyi basqından sonra kəskin şəkildə pisləşib. Basqın nəticəsində 9 nəfər, o cümlədən 8 türk və 1 ABŞ vətəndaşı həlak olub.
Zəəbi hesab edir ki, "soyqırım" məsələsi İsrail parlamentində müzakirə edilməməlidir. Bu məsələ yalnız Türkiyəyə aiddir və tarixçilər tərəfindən tədqiq edilməlidir.
"Donanma"nın aksiyasında iştirak edən Knessetin deputatı güman edir ki, İsrail "soyqırım" məsələsini gündəliyə çıxarmaqla, dünya ictimaiyyətinin diqqətini "Azadlıq donanması" ətrafında baş verən son hadisələrdən yayındırmaq istəyir.
"İsrailin "soyqırım" məsələsini müzakirə etmək əvəzinə, mülki vətəndaşların qətlə yetirilməsi ilə bağlı təhqiqata başlaması daha yaxşı olardı. "Soyqırım" müzakirəyə çıxarılsa, bütün ərəb deputatlar bu sənədin qəbulunun əleyhinə çıxış edəcəklər", - Zəəbi əlavə edib.
Ermənistan və erməni lobbisi bəyan edirlər ki, Türkiyənin sələfi Osmanlı İmperiyası 1915-ci ildə Anadoluda yaşayan ermənilərə qarşı soyqırım törədib. Bu faktın dünyada tanınmasını arzulayan ermənilər dünya ölkələrində "soyqırım" adlandırılan faktın təbliğini gücləndirərək bəzi ölkə parlamentlərinin onu tanımasına nail olublar.
