Azərbaycan, Bakı, 14 oktyabr /Trend, müxbir C.Süleymanov/
Regionun xüsusi xidmət orqanları ayrı-ayrı beynəlxalq terrorçu qrup və təşkilatların Mərkəzi Asiyaya, o cümlədən Qazaxıstana "meyl etmələrini" qeydə alırlar. Bu barədə Astanada Milli Təhlükəsizlik Komitəsinin sədri Nurtay Abıkayev məlumat verib.
Onun fikrincə, respublikada terrorçu qruplaşmaların meydana çıxması üçün birbaşa zəmin yoxdur, lakin təhlükə qalmaqdadır.
"Ümumilikdə Qazaxıstanda terrorizm üçün birbaşa zəmin yoxdur, lakin onun təhlükəsi bəzi xarici faktorların təsirindən realdır ki, onlardan biri də terrorçu və etnik dini ocaqlara yaxın olmaqdır", - Abıkayev ATƏT-in terrorizmin qarşısının alınması üzrə uğurlu strategiya, effektiv siyasət və qabaqcıl təcrübəyə həsr olunmuş konfransında çıxış zamanı deyib.
Onun məlumatına görə, Qazaxıstan vətəndaşlarının terrorçuluq fəaliyyətinə və ölkədə radikal baxışların yayılmasına cəlb edilməsi faktları qeydə alınıb.
MTK rəhbəri Qazaxıstan xüsusi xidmət orqanının ATƏT-in antiterror bölmələri ilə əməkdaşlığını və Qazaxıstanın bu təşkilatın terrorçuluq əleyhinə olan şəbəkəsinə qoşulmasını alqışlayıb.
Abıkayev ATƏT-in terrorizmin qarşısının alınması üzrə konfransların hər il keçirilməsi təklifinə baxmaq təşəbbüsünü irəli sürüb.
"Bu, ATƏT-in istənilən terrorçu təhdidlərin qarşısının alınması ilə bağlı birgə fəaliyyəti üçün daha bir səmərəli addım olacaq", - o vurğulayıb.
