Azərbaycan, Bakı, 3 dekabr /Trend/
Azərbaycanın Siyasi İnnovasiya və Texnologiya Mərkəzinin rəhbəri hesab edir ki, "WikiLeaks" saytının yaydığı materiallar ölkələr arasında gərginlik yaratmağa xidmət edir.
"Saytda məlumatı yaymaqla, Türkiyə-Azərbaycan, Azərbaycan-Rusiya və Azərbaycan-İran münasibətlərində gərginlik yaratmaq istəyiblər", - cümə günü Trend BİA-nın konfrans zalında keçirdiyi mətbuat konfransında mərkəzin rəhbəri, politoloq Mübariz Əhmədoğlu deyib.
Məxfi materialların çap edilməsi üzrə ixtisaslaşan "WikiLeaks" saytı tərəfindən ABŞ-ın müxtəlif ölkələrdəki diplomatik missiyalarından 250 min məxfi diplomatik məktub və teleqram "New York Times"a və bir sıra ABŞ və Avropa KİV-nə ötürülüb.
"Tam məxfi" qrifinin olduğu sənədlərdə Prezident Barak Obama administrasiyasının böhran və münaqişələrlə bağlı yazışmasının detalları açıqlanır, ABŞ diplomatlarının müsəlman ölkələrinin prezidentləri və Avropa liderləri haqqında kəskin fikirləri səslənir, güya müxtəlif ölkələrin liderlərinin ABŞ-ın dövlət qulluqçuları ilə apardıqları şəxsi söhbətlər və dövlət katibi Hillari Klintonun Təhlükəsizlik Şurasının Rusiya, Çin, Fransa və Böyük Britaniyadan olan üzvlərinin izlənilməsinin təşkil edilməsi barədə sorğusu yer alır.
Azərbaycan Prezidentinin mətbuat xidməti saytda dərc olunan məlumatları əsassız sayıb.
Əhmədoğlu "WikiLeaks" saytının yaydığı materiallarda ermənilərin əli olduğunu da istisna etməyib.
Politoloqun sözlərinə görə, "WikiLeaks" saytının gərginlik yaratdığı dönəmdə Turqut Ərin Azərbaycanla bağlı kitabı da Azərbaycan-Türkiyə münasibətlərində gərginliyi daha da artırdı.
"Bu kitab Azərbaycan-Türkiyə dostluğunun ziyanına öz sözünü dedi. Türkiyə-Azərbaycan münasibətlərində gəginlik yaratmaq yalnız Azərbaycan və Türkiyəni istəməyənlərin xeyrinədir", - Əhmədoğlu əlavə edib.
Azərbaycanda çalışmış türkiyəli diplomat Turqut Ərin müəllifi olduğu "Azadlıqdan tiranlığa" adlı kitabdakı əsassız fikirlər "Azadlıq" qəzetində çap olunub.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
