Azərbaycan, Bakı, 19 aprel /Trend, müxbir E.Mehdiyev/
İsrail və Azərbaycan neft-kimya sənayesində əməkdaşlığı genişləndirməyə çalışır. Bu barədə İsrailin Azərbaycandakı səfiri Mixael Lotem İsrailin Müstəqillik Günü və iki ölkə arasında diplomatik əlaqələrin qurulmasının 20 illiyi münasibətilə Trend-ə müsahibəsində deyib.
"Bu sahədə Azərbaycanın böyük təcrübəsi var. İsrail də belə təcrübəyə malikdir. Biz bu təcrübədən həmin sahədə iri istehsalçı olmaq üçün istifadə edəcəyik", - səfir bildirib.
İsrailin və Azərbaycanın neft-qaz sektorunda əməkdaşlığına gəlincə, Lotem deyib ki, Azərbaycanın "Caspian Drilling Company" şirkəti İsrail şirkətləri ilə əməkdaşlıq etməklə İsraildə dəniz neft yataqlarının kəşfiyyatında iştirak edir.
Diplomatın qeyd etdiyi kimi, İsrail Azərbaycandan əhəmiyyətli həcmdə neft alır. O, həmçinin əlavə edib ki, bu sahədə iki ölkənin əməkdaşlığının perspektivləri həqiqətən də çox şey vəd edir.
Lotem İsraillə Azərbaycan arasında iqtisadi münasibətlərə toxunaraq deyib ki, onların inkişaf etdirilməsi üçün bir neçə üsul var.
"Azərbaycandan İsrailə, eləcə də İsraildən Azərbaycana nümayəndə heyətlərinin səfərləri təşkil edilir. Əlbəttə, iş adamları və şirkətlərin nümayəndələrinin də yer aldığı həmin nümayəndə heyətləri müxtəlif şirkətlərlə görüşlər keçirirlər və bu da münasibətlərin gələcək inkişafına şərait yaradır", - səfir deyib.
Onun sözlərinə görə, münasibətlərin inkişafının başqa yolu "dost dostu gətirir" İsrail üsuludur. Bu o deməkdir ki, burada biznesi cazibədar hesab edən insan bura daha kimisə gətirib çıxara bilər.
"Mən bir çox israilli tanıyıram ki, Azərbaycan barədə haradasa oxuduqlarına görə deyil, yaxşı dostların onlara yaxşı biznes istəyirlərsə Azərbaycana gəlməyi məsləhət gördüklərinə görə Azərbaycandadırlar. Şübhəsiz ki, hadisələrin açıqlığı münasibətlərin inkişafının təşviqi üsuludur və İsraildə Azərbaycan barədə bilirlər", - Lotem bildirib.
