Azərbaycan, Bakı, 26 noyabr /Trend, müxbir M.Əliyev/
Bakıda Qara Dəniz İqtisadi Əməkdaşlıq Təşkilatı Parlament Assambleyasının (QDİƏT PA) Daimi Komitəsinin 40-cı iclası öz işinə başlayıb.
Trend-in məlumatına görə, iclasın açılışında QDİƏT PA-nın vitse-prezidenti Asəf Hacıyev bildirib ki, Daimi Komitənin iclasında ötən iclasın protokolunun təsdiq olunması, yeni mandatlara baxılması, Türkdilli Ölkələrin Parlament Assambleyasının (TürkPA) müşahidəçi qismində QDİƏT-ə qəbul olunması, həmçinin QDİƏT nümayəndələrinin beynəlxalq tədbirlərdə iştirakı ilə bağlı hesabatları müzakirəyə çıxarılıb.
Hacıyev qeyd edib ki, 39-cu Baş Assambleyanın keçirilməsindən ötən dövr ərzində Yunanıstan və Gürcüstanda keçirilən seçkilərdən sonra yeni milli nümayəndəliklər formalaşıb.
İclasda TürkPA-nın baş katibi Ramil Həsənovun QDİƏT rəhbərliyinə ünvanladığı məktub oxunub. Müzakirələrdən sonra TürkPA quruma müşahidəçi qismində qəbul edilib.
Qeyd edək ki, QDİƏT Baş Assambleyasının 40-cı iclası noyabrın 27-də Milli Məclisin plenar zalında öz işinə başlayacaq.
...