Azərbaycan, Bakı, 14 avqust /Trend, müxbir S.Əhmədova/
Türkiyə özünün dinamik iqtisadiyyatı və strateji coğrafi mövqeyi ilə Avropa İttifaqının üzvlüyünə namizəd ölkə və Aİ-nin əsas tərəfdaşlarından biridir. Bu barədə Trend-ə müsahibəsində Aİ-nin xarici əlaqələr və təhlükəsizlik siyasəti üzrə ali nümayəndəsi Ketrin Eştonun sözçüsü Maya Koçiyançiç deyib.
Koçiyançiç qeyd edib ki, Aİ üzvlüyünə namizəd bir ölkə kimi Türkiyə Aİ-nin dəyərlərini və məqsədlərini bölüşməlidir: "Aİ Şurası özünün 11 dekabr 2012-ci il tarixli rəyində Aİ-nin Türkiyə ilə münasibətlərə verdiyi əhəmiyyəti bir daha təsdiq edib".
Koçiyançiçin sözlərinə görə, Şura bəyan etmişdi ki, Aİ öhdəliklərinə və eyni zamanda Aİ-Türkiyə əməkdaşlığına uyğun həyata keçirilən aktiv və səmərəli danışıqlar Aİ-Türkiyə əməkdaşlığının tam potensialına nail olmağa imkan verəcək: "Türkiyədə həyata keçirilən islahatlarda Aİ-nin əsas meyar olmasını təmin etməklə Türkiyənin Aİ-ə daxil olması ilə bağlı danışıqların tezliklə yeni təkan götürməsi hər iki tərəfin marağındadır".
Türkiyə bu meyarların yerinə yetirilməsini təkmilləşdirmək, danışıqlar çərçivəsinin tələblərinə əməl etmək və Aİ qarşısında müqavilə öhdəliklərinə hörmət etməklə danışıqları sürətləndirə bilər.
