"Kişinyovda GUAM Parlament Assambleyasının növbəti toplantısında iştirak edən Azərbaycan nümayəndə heyəti sentyabrın 28-də Moldova parlamentinin sədri Marian Lupu ilə görüşüb". Bu barədə Trend agentliyinə nümayəndə heyətinin üzvü, millət vəkili Cahangir Hüseynov bildirib.
C.Hüseynov onu da vurğulayıb ki, M.Lupu, həmçinin, GUAM dövlətləri Parlmaent Assambleyasının sədri vəzifəsini icra edir: "Görüşlərimiz çox effektli alınıb. Yenə də Dağlıq Qarabağ məsələsini gündəmə gətirdik. Dnestryanı ölkələrlə Dağlıq Qarabağ problemini birlikdə həll etmək təklifi ilə çıxış etdik. Təklifimiz yüksək səviyyədə bəyənildi".
Nümayəndə heyətinin digər üzvləri Elman Məmmədovla Elton Məmmədovun GUAM ölkələrinin iqtisadi cəhətdən inkişaf perspektivləri barədə fikirlərinin qəbul edildiyini bildirən C.Hüseynov Moldova parlamentinin sədri Marian Lupunun da Azərbaycanla bağlı yüksək fikirdə olduğunu qeyd edib.
Millət vəkili Moldovada Azərbaycan diaspora nümayəndələri ilə keçirdikləri səmərəli görüşlərdən də danışıb: "Burada iş adamları ilə də görüşdük. "Lukoyl"un Moldova üzrə baş direktoru Feruz İsayevlə apardığımız söhbətlər hər iki dövlətin iqtisadi maraqları üzərində quruldu".
Nümayəndə heyəti sentyabrın 30-da Azərbaycana qayıdacaq.
