Azərbaycanda Avropada Təhlükəsizlik və Əməkdaşlıq Təşkilatının Demokratik İnstitutlar və İnsan haqları Bürosunun müşahidəçilərinin hesabatı oktyabrın sonlarında açıqlana bilər. Bu barədə Trend ə beynəlxalq müşahidəçilər missiyasının Bakı ofisindən məlumat verilib.
Missiyadan bildiriblər ki, beynəlxalq müşahidəçilər respublikanın regionlarında fəal müşahidə işi aparır. Sonuncu qərara uyğun olaraq, seçkiqabağı vəziyyəti öyrənmək məqsədilə ekspertlər Kürdəmir və Tovuz rayonlarına yola düşüblər.
İlk ilkin hesabat sentyabrın 30-da açıqlanıb. Sənəddə bildirilir ki, ATƏT-in DİİHB və Avropa Şurasının (AŞ) Venesiya Komissiyasının Seçki Məcəlləsinin təkmilləşdirilməsinə dair yönəlmiş təklifləri hökumət tərəfindən nəzərə alınmayıb. Baxmayaraq ki, bu addım ictimaiyyətin seçki prosesinə etimadını daha da artırmağa xidmət edirdi. Sənəddə o da bildirilib ki, "SM-nin təkmilləşdirilməsinin aktual istiqamət kimi qalmasına baxmayaraq, düzgün istifadə olunduğu halda hazırki qanunvericilik bazası demokratik seçkilərin keçirilməsinə imkan verə bilər".