Ötən il ərzində 80 bələdiyyə sədri barəsində protokol tərtib edilərək məhkəməyə göndərilib. Trend xəbər verir ki, bu barədə jurnalistlərə Azərbaycan Respublikası Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə məlumat verib.
Mərkəzin rəisi bildirib ki, ötən il ərzində Mərkəz tərəfindən 10.120 bələdiyyə aktına baxılıb. Nazirliyin təklifləri əsasında həmin aktlardan 300-dən çoxu ləğv edilib və ya dəyişdirilib. Bəzi aktların ləğvi ilə bağlı iddialar qaldırılıb, bələdiyyə aktlarını vaxtında təqdim etməyənlər barədə protokol tərtib edilərək məhkəməyə göndərilib.
"İnzibati nəzarət qaydasında aparılmış 22 araşdırma nəticəsində 28 bələdiyyə aktı ləğv edilib. Müəyyən edilmiş 343 milyon manatdan (68.600 ayn) çox maliyyə çatışmazlığı yerli büdcələrə ödətdirilib. Ciddi qanun pozuntuları barədə 2004-cü illə müqayisədə 3 dəfə çox - 15 bələdiyyənin fəaliyyəti ilə bağlı müvafiq sənədlər prokurorluq orqanlarına göndərilib. Ümumiyyətlə isə, 2005-ci il üzrə bələdiyyələr tərəfindən 2,6 milyard manat (520.000 ayn) məbləğində maliyyə pozuntusuna yol verilməsi aşkar olunub" - deyə M.Səlimzadə qeyd edib.
M.Səlimzadə onu da söyləyib ki, Bələdiyyələrlə İş Mərkəzi özünüidarə orqanlarına metodoloji yardımın göstərilməsi, habelə bələdiyyələrin fəaliyyətinə inzibati nəzarətin həyata keçirilməsi məqsədilə ölkənin demək olar ki, bütün regionlarını əhatə edən 20-dən çox zona seminarı keçirilib. Hüquq Tədris Mərkəzi ilə birgə 150-dək bələdiyyə üzvü və bələdiyyə qulluqçusu ixtisaslaşdırma kurslarına cəlb olunub.