Martın ilk ongünlüyündə Azərbaycanda cəza çəkən İran İslam Respublikasının (İİR) 20-yə yaxın vətəndaşı öz ölkəsinə veriləcək. Bu barədə Trend ə Azərbaycan Respublikası Ədliyyə Nazirliyinin Beynəlxalq Hüquq Əməkdaşlığı İdarəsinin rəisi Zavər Qafarov məlumat verib.
Z.Qafarovun sözlərinə görə, həm İİR, həm də Azərbaycan Avropa Şurası tərəfindən 1983-cü ildə qəbul edilmiş məhkumun cəza çəkməsi üçün vətəndaşı olduğu ölkəyə verilməsi ilə əlaqədar Konvensiyanın üzvüdür. Həmin Konvensiyaya uyğun olaraq İİR Ədliyyə Nazirliyi 20-yə yaxın məhkumun cəzasının qalan hissəsini öz vətənində çəkməsi ilə əlaqədar Azərbaycanın Ədliyyə Nazirliyi qarşısında vəsatət qaldırıb. Həmin vəsatətə uyğun olaraq məhkumların ölkələrinə verilməsi hər iki ölkə arasında razılaşdırılıb.
"Azərbaycan beynəlxalq hüquq əməkdaşlığı üzrə çoxsaylı tədbirlər həyata keçirir və bir sıra ölkələrlə hüquqi yardım sahəsində müqavilələr bağlanır. Müqavilə bağlanılan ölkələr sırasında İran da var və demək olar ki, hər il ərzində iki dəfə məhkumların verilməsi prosesi həyata keçirilir. O cümlədən, İranda məhkum edilmiş azərbaycanlılar da məhkumluqlarının qalan hissəsini öz vətənlərində çəkmələri üçün bizə qaytarılır" - deyə Z.Qafarov bildirib.
İdarə rəisinin sözlərinə görə, məhkumların cəzalarının qalan hissəsinin vətəndaşları olduqları dövlətdə çəkməsi ilə bağlı Azərbaycanın Ədliyyə Nazirliyinə ayrı-ayrı ölkələrdən 250-dən artıq müraciət daxil olub. Həmin müraciətlərin bir qismi həllini tapıb, bir qismi isə hazırda baxılma mərhələsindədir. Hazırda ölkəmizdə cəza çəkən 380-ə yaxın əcnəbi vətəndaş cəza çəkir.
