Demokratik İslahatlar Partiyasının (DİP) sədri, millət vəkili Asim Mollazadə mayın 17-də Fransanın Azərbaycandakı səfiri Bernar Amodrik Şafo ilə görüşüb. Bu barədə Trend ə DİP-dən məlumat verilib.
Görüşdə ölkədəki ictimai-siyasi vəziyyət, mayın 13-də parlamentə keçirilən təkrar seçkilər, Azərbaycanın Avroatlantik sistemə inteqrasiyası, Avropa Birliyinin yeni qonşuluq siyasətindən irəli gələn məsələlər və Azərbaycan-Ermənistan münaqişəsi ətrafında cərəyan edən proseslər müzakirə olunub. Asim Mollazadə seçkilər, ölkəmizin mövcud seçki qanunvericiliyi və seçki sistemində zəruri olan islahatlar barədə partiyanın mövqeyini səfirin diqqətinə çatdırıb.
Görüşdə Azərbaycan-Fransa münasibətləri, ölkələrimiz arasında çoxtərəfli əməkdaşlıq məsələləri və inkişaf proqramları da diqqət mərkəzində olub. Fransa ilə Azərbaycanın münasibətlərinə xələl gətirən amillər barədə ətraflı fikir mübadiləsi aparılıb.
