Ekologiya və təbii sərvətlər naziri Hüseyn Bağırov Samux rayonuna səfər edib. Trendin Qərb Bürosunun verdiyi məlumata görə, səfərdə məqsəd Eldar şamı Dövlət Təbiət Qoruğunda aparılan işlərlə tanış olmaqdır.
Naziri rayonda icra başçısı Vilyam Hacıyev qarşılayıb. İlk olaraq Hüseyn Bağırov və Vilyam Hacıyev Samuxun Kəsəmən kəndinin sakinləri ilə görüşüb sonra isə yaxınlıqda yerləşən Eldar şamı Dövlət Təbiət Qoruğuna gediblər. Burada Qoruğun Elmi Tədqiqat və inzibati binasına baxış keçirib, nazir qoruq işçilərinə öz tapşırıqlarını verib. Daha sonra Qoruq ərazisinə baş çəkilib.
"Eldar Şamı Dövlət Qoruğunda görülən işlərdən razıyam. Gözəl kompleks yaradılıb. Prezidentin tapşırığı ilə qoruq fəaliyyətə başlamalıdır. Ola bilsin ki, biz gələcəkdə qoruğun ərazisini genişləndirək. Artıq Şirvan Milli Parkında ceyranlar üçün yer azlıq edir. Biz istəyirik ki, tarixən bu yerə ad vermiş ceyranları qoruğa qaytaraq. Bu məsələ gündəlikdədir, bunun üçün Ekologiya və Təbii Sərvətlər Nazirliyində layihə hazırlanır" - deyə nazir bildirib.
Hüseyn Bağırov onu da bildirib ki, vaxtilə qoruq 395 hektarlıq kiçik bir ərazini əhatə edib və Göygöl qoruğunun filialı olub. "Təbii ki, iki qoruğu bir yerdə idarə etmək çətin olardı. Ümumiyyətlə, böyük ərazidə mühafizə işini təşkil etmək də çətindir. Yerli İcra Hakimiyyəti orqanlarının köməkliyi sayəsində Qoruğun ərazisi genişləndiriliərək 1600 hektara çatdırılıb. Qoruğun yaradılmasında əsas məqsəd Eldar şamının qorunmasıdır" - bunu da H. Bağırov qeyd edib.
Məlumat üçün bildirək ki, ölkə başçısının 2004-cü il 16 dekabr tarixli sərəncamına əsasən, Eldar Şamı Dövlət Təbiət Qoruğu yaradılıb. Dəniz səviyyəsindən 500 metr hündürlükdə yerləşən Qoruqhazırda 1600 hektar ərazini əhatə edir.