Azərbaycan, Bakı, 13 fevral / Trend / ABŞ-ın Beynəlxalq İnkişaf Agentliyi (USAID) Azərbaycanda "Medianın müdafiəsi və alternativ medianın inkişafı" adlı mübadilə proqramı həyata keçirəcək.
Proqram Azərbaycan mütəxəssislərinin "Şərəf və ləyaqətin alçaldılması" barədə ABŞ qanunlarını öyrənmə imkanlarını nəzərdə tutur. İştirakçılar 2008-ci ilin fevralında Bakı, Quba və Lənkərandan seçiləcək.
Proqram mayın 28-dən iyunun 18-dək həyata keçiriləcək. Layihədə yazılı KİV, televiziya, radio, informasiya agentlikləri , Rabitə və İnformasiya Texologiyaları Nazirliyi, Jurnalistlər Birliyi, universitetlərin jurnalistika fakültələri, Prezident Aparatı, Televiziya və Radio Şurası, Mətbuat Şurası, hüquq müdafiə qeyri-hökumət təşkilatlarının nümayəndələri iştirak edə bilərlər.
İddiaçılar peşəkarlıq qabiliyyəti ilə seçilməli və ən azı iki illik iş təcrübəsinə malik olmalıdırlar. İngilis dilini bilmək mütləq deyil.
Seçim "Project Harmony" şirkəti tərəfindən həyata keçiriləcək.
