...

Azərbaycanda vəkillər məhkəmə proseslərinə mantiya geyinməkdən imtina edirlər

Cəmiyyət Materials 17 Aprel 2008 16:59 (UTC +04:00)

Azərbaycan, Bakı, 17 aprel / Trend , müxbir K.Zərbalıyeva/ Ötən ildən vəkillərin məhkəmə proseslərinə mantiyada çıxması barədə qərar qəbul olunsa da, vəkillərimiz hələ də mantiya geymək istəmirlər.

Ötən ildən başlayaraq Azərbaycanda da belə bir praktikanın əsası qoyulub. Prezidentin Vəkillər Kollegiyasının maddi-texniki bazasının yaxşılaşdırılması haqqında sərəncamı ilə vəkillərin xüsusi geyim formaları ilə təmin edilməsi üçün büdcədən vəsait artırılıb.

Həmin vəsait Vəkillər Kollegiyasını təsis etmiş vəkillərin geyim formaları ilə pulsuz təmin olunması üçün ayrılıb. Vəkillər Kollegiyasından bildirilib ki, təsisçi olmuş 404 vəkilə geyim formaları pulsuz verilib. Kollegiyaya sonradan üzv olmuş vəkillərə mantiya 70 manata başa gəlir.

Praktikada vəkillərin prosesdə mantiyada iştirak etməsinə çox az hallarda təsadüf olunur.

Vəkil İradə Cavadova hesab edir ki, vəkillərin məhkəmə proseslərinə xüsusi geyim formasında-mantiyada çıxması bir müddət məcbur olmalıdır. Vəkillərin proseslərə mantiyada çıxmasının tərəfdarı olan Cavadova deyib ki,bu, vəkil mədəniyyətidir və vəkillər bu mədəniyyəti gözləməlidir.

Vəkil hesab edir ki, belə vəkillərə qarşı bir müddət məcburiyyət tətbiq olunmalı, mantiyada prosesə çıxmayan vəkillər cəzalandırılmalıdırlar.

Onun sözlərinə görə, məhkəmə binalarının bir qismində vəkillər üçün xüsusi otaqlar yoxdur və onların mantiyanı geyinməsi üçün şərait yaradılmayıb. Bu da vəkillərin mantiya ilə proseslərə çıxmasında problemlər yaradır. Cavadova deyib ki, Ali Məhkəmədə və Ağır Cinayətlərə Dair İşlər üzrə Hərbi Məhkəmədə vəkillərin proseslərə mantiyada çıxması tələb olunur. "Elə böyük proseslər var ki, işə çıxan vəkillərin sayı çox olur. Həmin proseslərdə vəkillərlə prosesdə iştirak edən digər şəxsləri fərqləndirmək mümkün olmur. Bu hakimlərə də problem yaradır. Bu baxımdan vəkillərin mantiyada olması vacibdir",-deyə vəkil vurğulayıb.

Vəkil Elman Osmanov da hesab edir ki, vəkillər proseslərə mantiyada çıxmağa adət edənədək bu məcburi olmalıdır. Osmanov vəkillərin mantiyadan istifadə etməməsini məsuliyyətsizlik və tənbəllik kimi dəyərləndirib.

Azərbaycan məhkəmə sistemində çoxsaylı problemlərin olduğunu vurğulayan vəkil Fuad Ağayev bu məsələnin qabardılmasına ehtiyac görmür. "Vəkillərin mantiyada proseslərə çıxması 100 illərlə formalaşmış bir ənənədir. Belə çıxır ki, sabah vəkillərin parik geyinmələri qəbul olunarsa, biz də bunu geyinməyə məcburuq?",-deyə Ağayev bu məsələyə etiraz edib.

Məcburiyyətlərin əleyhinə olan vəkil İsaxan Aşurov vəkillik xidmətinin mantiya ilə ölçülməsi fikri ilə razılaşmır. Aşurov yüksək məhkəmə instansiyası hesab olunan Ali Məhkəmədə vəkillərin mantiya ilə prosesə çıxmasının tərəfdarıdır. "Birinci instansiyada və Apellyasiya Məhkəməsində vəkillərin mantiya geyinməsinə ehtiyac yoxdur",-deyə vəkil vurğulayıb.

O hesab edir ki, vəkillərin mantiya geyinməsi müəyyən problemlər yaradır. "Yayda havalar isti olduğundan mantiyanı geymək mümkün deyil. Bütün hallarda mantiyanı geymək məcburi olmamalıdır",-deyə Aşurov bildirib.

Vəkillər Kollegiyasının sədr müavini Fərhad Nəcəfov bildirib ki, qanunvericilikdə vəkillərin mantiya ilə proseslərə çıxmamasına görə cəza tədbirləri nəzərdə tutulmayıb. Sədr müavini qeyd edib ki, vəkillərin hamısı mantiya ilə təmin olunmadığı üçün mantiyasız prosesə çıxan vəkilləri cəzalandırmaq mümkün deyil. Lakin Nəcəfov bu proses tam yekunlaşandan sonra mantiyasız prosesə çıxan vəkillər barəsində gələcəkdə cəza tədbirlərinin görüləcəyini də istisna etmir.

Sədr müavini bu problemin yaranmasında məhkəmələrdə vəkillər üçün lazımi şəraitin olamasının da rol oynadığını qeyd edib. Onun sözlərinə görə, məhkəmə sədrləri, hakimlər vəkillərin proseslərə mantiyada çıxmasını tələb etməlidir və belə olarsa, bir müddət sonra bu, vəkillərdə adətə çevriləcək.

Azərbaycanda vəkillərin fəaliyyəti "Vəkillər və vəkillik fəaliyyəti haqqında" Qanunla və Vəkillər Kollegiyasının Nizamnaməsi ilə nizamlanır.

Vəkillər Kollegiyasının 780 üzvü var. Azərbaycan vəkillərin sayına görə Avropa dövlətləri arasında sonuncu sıralarda durur.

Məqalənin  müəllifi ilə [email protected] ünvanı  ilə əlaqə saxlaya bilərsiniz

Xəbər lenti

Xəbər lenti