Azərbaycan, Bakı, 05 iyun/ Trend , müxbir İ.Əlizadə/ Parlamentin İnsan hüquqları komissiyası 2007-ci ildə Azərbaycanda insan alverinə qarşı mübarizənin zəifləməsi ilə bağlı ABŞ Dövlət Departamentinin hesabatı ilə razı deyil. "Azərbaycanda insan alverinin qarşısı tam alınmasa da, bununla bağlı faktlar hər il azalır və vəziyyət, digər ölkələrlə müqayisədə pis deyil", - deyə cümə axşamı Trend -a açıqlamasında parlamentin İnsan hüquqları daimi komissiyasının sədr müavini Yevda Abramov bildirib.
ABŞ Dövlət Departamenti 2007-ci ildə dünya ölkələrində insan alveriylə bağlı son hesabatıı açıqlayıb. Hesabatda bildirilir ki, ötən il Azərbaycanın hüquq-mühafizə orqanlarının insan alverinə qarşı mübarizəsi zəifləyib. Hesabatda qeyd olunub ki, qanunlar insan alveriylə məşğul olanlara 15 ilədək həbs cəza nəzərdə tutur, reallıqda isə, keçən il məhkəmələr belə şəxslərin yarısından çoxuna yüngül cəza veriblər. İnsan alveri ilə məşğul olanların bir qismi ya ev dustaqlığı, ya da şərti cəza ilə cəzalanıblar, qalanlarına isə, 1 ildən 10 ilədək həbs cəzası verilib.
Yerli qeyri-hökumət təşkilatlarının bildirdiyinə görə, məhkəmələrdəki korrupsiya insan alverinə qarşı mübarizəni çətinləşdirir.
Dövlət Departamenti hesab edir ki, Azərbaycandan qadınlar cinsi istismar üçün, əsasən, Türkiyə və Birləşmiş Ərəb Əmirliklərinə aparılır. Azərbaycan həm də Orta Asiyadan Türkiyəyə gedən insan alveri marşrutunda tranzit ölkədir.
İnsan alveri ilə bağlı hesabat dünyanın 170 ölkəsini əhatə edir.
Daxili İşlər Nazirliyinin (DİN) İnsan Alverinə Qarşı Mübarizə İdarəsinin məlumatına görə, son üç ildə insan alveri ilə məşğul olan 93 cinayətkar qrup, 15 mütəşəkkil dəstə ifşa olunub. Bu fəaliyyətlə məşğul olan 695 nəfər cinayət məsuliyyətinə cəlb olunub.
Abramov qeyd edib ki, ABŞ Dövlət Departamenti və digər beynəlxalq təşkilatların Azərbaycanla bağlı hesabatları obyektiv olmur və reallığı əks etdirmir: "Belə hesabatlar hazırlanan zaman ikili standartlara yol verilir və hesabatlar qərəzli olur".
Komissiya sədrinin müavini hesab edir ki, Azərbaycan qanunvericiliyində insan alveri ilə mübarizə sahəsində boşluq yoxdur. Onun fikrincə, qanunvericilik hüquq mühafizə orqanlarına insan alveri ilə məşğul olan şəxsələrə ciddi tədbirlər görməyə imkan verir.
Abramov bildirib ki, insan alverinin qurbanları bir çox hallarda faktları gizlədirlər. Bu da insan alveri ilə məşğul olan şəxslərə məhkəmələr tərəfindən ağır cəza verilməsinin qarşısını alır.
"Məhkəmələrdə də ciddi problemlər var və əhalinin əsas şikayəti bu strukturdandır. Məhkəmələrdə işlərə ciddi baxılmır", - deyə komissiyanın sədr müavini əlavə edib.
Məqalə müəllifi ilə əlaqə ünvanı: [email protected]