Azərbaycan, Bakı, 08 iyul / Trend , muxbir H.Bağırov /
GEN MMC-nin dələduzluqda günahlandırılan rəhbərinin cinayət işi üzrə hazırlıq iclası keçirilib.
Ağır Cinayətlərə Dair İşlər üzrə Məhkəmədə çərşənbə günü keçirilən prosesdə vəkillərin vəsatətləri müzakirə olunub və qərar qəbul edilib.
"Gen" MMC-nin rəhbəri Elburus Əliyev və digər 9 nəfər Cinayət Məcəlləsinin 178.3.1-ci və 178.3.2-ci (mütəşəkkil dəstə tərəfindən külli miqdarda ziyan vurmaqla dələduzluq etmə) maddələri ilə ittiham olunurlar.
Əliyev vətəndaşların əmlakını aldatma yolu ilə ələ keçirmək məqsədi ilə tanışları Asif Ələmovun adına "Nəcibə", Həbib Ağayevin adına "GEN" və öz adına "Uğurlar", "Elgün E" və "GEN Holdinq" məhdud məsuliyyətli cəmiyyətlər təsis edib. Həmin cəmiyyətlərin işçiləri Asif Ələmov, Həbib Ağayev, Mehbarə Cəfərzadə, Əliyar Abbasov, İlkin Səfərov, Ramil Əliyev, Kamran Əhmədov və Nəbi Məmmədovdan ibarət mütəşəkkil dəstə yaradıblar. Dəstə üzvləri 2006-cı ilin ortalarından 2008-ci ilin aprelinə kimi həmin cəmiyyətlər tərəfindən guya Bakı şəhəri Xətai, Nəsimi və Yasamal rayonlarının, habelə Abşeron rayonunun ərazilərində çoxmərtəbəli yaşayış binaları inşa ediləcəyi və həmin binalardan vətəndaşlara mənzillərin satılacağı barədə kütləvi informasiya vasitələrində reklam və elanlar verib, 373 vətəndaşı aldadaraq onların 8 milyon 59 min 138 manat məbləğində pullarını dələduzluq yolu ilə ələ keçiriblər.
Zərərçəkmişlərin nümayəndəsi Vidadi İsgəndərov ibtidai istintaq zamanı pozuntulara yol verildiyini və hüquqlarını müdafiə etdiyi şəxslərin hüquqlarının pozulduğunu əsas gətirərək cinayət işinin təkrar araşdırılması üçün prokurorluğa göndərilməsini xahiş edib.
Vəkil İntiqam Həsənov müdafiə etdiyi Nəbi Məmmədovun bronxial asmadan və ağ ciyər xəstəliyindən əziyyət çəkdiyini əsas gətirərək onun barəsindəki həbsin ev dustaqlığı ilə əvəzlənməsi barədə vəsatət verib.
Vəsatətlər təmin olunmayıb və iş məhkəmə baxışına qəbul olunub.
İş üzrə məhkəmə baxışı iyulun 21-də başlayacaq.
Məqalə müəllifi ilə əlaqə ünvanı: [email protected]
...