Azərbaycan, Bakı, 19 oktyabr / Trend , müxbir K.Zərbalıyeva/
Azərbaycan Konstitusiya Məhkəməsi şahidin məhkəmə qərarından şikayət vermək hüququnu tanıyıb.
Konstitusiya Məhkəməsindən Trend -a verilən məlumata görə, Bakı şəhəri Nəsimi rayon məhkəməsinin 19 mart 2009-cu il tarixli müraciəti əsasında Cinayət-Prosessual Məcəlləsinin 449.2.3-cü maddəsinın şərh olunması ilə bağlı Konstitusiya Məhkəməsinin qərarı elan olunub.
CPM-in 449.2-ci maddəsində qeyd olunur ki, cinayət prosesini həyata keçirən orqanın prosessual hərəkətlərindən və ya qərarlarından təqsirləndirilən (şübhəli) şəxs və onun müdafiəçisi; zərər çəkmiş şəxs və onun qanuni nümayəndəsi; qərarın qəbul edilməsi və ya hərəkətin aparılması nəticəsində hüquq və azadlıqları pozulan digər şəxslər şikayət vermək hüququna malikdirlər.
KM-in qərarında qeyd olunur ki, Cinayət-Prosessual Məcəlləsinin 449.2.3-cü maddəsinin "qərarın qəbul edilməsi və ya hərəkətin aparılması nəticəsində hüquq və azadlıqları pozulan digər şəxslər" müddəası cinayət prosesinin digər iştirakçılarına aid olduğuna görə cinayət prosesini həyata keçirən orqanın prosessual hərəkətlərindən və ya qərarlarından şahidin də şikayət vermək hüququnu istisna etmir.
Şahidlər cinayət təqibini həyata keçirən orqanın vəzifəli şəxslərinin qərarlarından və hərəkətlərindən (hərəkətsizliyindən) şikayət vermək hüququna o halda malikdirlər ki, həyata keçirilmiş hərəkətlər və qəbul olunmuş qərarlar onların hüquq və qanuni maraqlarına toxunmuş olsun, Konstitusiya ilə təsbit olunmuş hüquqlarına və azadlıqlarına zərər yetirə və yaxud ədalət mühakiməsinə müraciətini (əlçatanlığını) çətinləşdirə bilsin.
Məqalə müəllifi ilə əlaqə ünvanı: [email protected]
