Azərbaycan, Bakı, 12 noyabr / Trend , H.Bağırov/
Azərbaycan paytaxtında taksi sürücüsünü xüsusi amansızlıqla qətlə yetirməkdə ittiham olunan bacı-qardaşın məhkəməsi başa çatıb.
Ötən il dekabrın 17-də Fatmai bağlar massivində yerləşən "Muğan" pansionatının yaxınlığında 50 yaşlı Aşur Nəsirovun bıçaqla qətlə yetirilmiş meyiti aşkar olunub. Onun idarə etdiyi "A-Lizinq" ASC-yə məxsus "Azsamand" markalı 90-AJ-578 dövlət nömrə nişanlı maşın həmin gün saat 21:30 radələrində Biləcəri şosesində yolun kənarında tapılıb. Binəqədi rayon Polis İdarəsinin 4-cü polis bölməsi əməkdaşlarının keçirdiyi əməliyyat tədbirləri nəticəsində qətldə şübhəli bilinən 30 yaşlı Solmaz Rəhimova tutulub. Rəhimovanın ifadəsi əsasında cinayətdə iştirak edən qardaşı Səbuhi Rəhimov da məsuliyyətə cəlb edilib.
Trend -un məlumatına görə, cümə axşamı Ağır Cinayətlərə Dair İşlər üzrə Məhkəmənin hökmü ilə Səbuhi Rəhimova 15 və Solmaz Rəhimovaya 13 il azadlıqdan məhrumetmə cəzası verilib. Təqsirləndirilən şəxslər Cinayət Məcəlləsinin qəsdən adam öldürmə (120.2.1, 120.2.2, 120.2.4) maddələri ilə ittiham olunublar.
Məqalə müəllifi ilə əlaqə ünvanı: [email protected]
