Azərbaycan, Bakı, 14 yanvar / Trend , müxbir M.Əliyev/
ABŞ və Norveçin Azərbaycandakı səfirlikləri Naxçıvan Мuxtar Respublikasının Bənənyar kəndindəki hadisə ilə əlaqədar olaraq bəyanatla çıxış ediblər və Azərbaycan hökumətinə öz narahatlıqlarını bildiriblər.
Yanvarın 13-də Bənənyar kəndindəki vəziyyətlə yaxından tanış olmaq məqsədi ilə ABŞ və Norveç səfirliklərinin diplomatları həmin kəndə yola düşüblər, lakin onlar kəndə buraxılmayıb və Bakıya qayıtmağa məcbur ediliblər. Bu barədə Norveçin Azərbaycandakı səfirliyinin məlumatında deyilir.
"Biz Azərbaycan hökumətini Bənənyar kəndində baş verən insidenti tam şəkildə araşdırmağa və Azərbaycanda çalışan xarici diplomatların təhlükəsizliyini təmin etməyə çağırırıq", - məlumatda deyilir.
KİV-in bildirdiyi kimi, ötən il dekabrın 27-də Aşura günü ilə bağlı tədbirlər zamanı polis və kənd sakinləri arasında qarşıdurma baş verib və bir neçə nəfər həbs olunub.
