Azərbaycan, Bakı, 28 iyun /Trend, müxbir İ.İsabalayeva/
"Mozalan" kinojurnalına ictimai diqqəti artırmaq, onun süjetlərini müasir həyatın tələblərinə cavab verən mövzularla zənginləşdirmək və kinodramaturgiyanın bu növünə yeni qüvvələr cəlb etmək məqsədi ilə Mədəniyyət və Turizm Nazirliyinin keçirdiyi ssenari müsabiqəsinin nəticələri açıqlanıb.
Nazirliyin mətbuat xidmətindən çərşənbə axşamı Trend-ə verilən məlumata görə, müsabiqəyə professional kinodramaturqların və digər müəlliflərin müasir həyatımızın problemlərini əks etdirən, 2-4 dəqiqəlik bədii süjet üçün nəzərdə tutulan ssenariləri təqdim olunub.
Münsiflər heyətinin qərarına əsasən, "Mozalan" kinojurnalı üçün ssenari müsabiqəsinin üç qalib ssenarisi təsdiqlənib. Həmin ssenarilər "Ağıllı" və ya "Nağdsız haqq-hesab" (müəllif: Məlikov Rüfət), "Lift" (müəllif: Elçin Musaoğlu) və "Heyvanlar aləminə səyahət"dir (müəllif: Lalə Abbasova).
Münsiflər heyətinin müəyyən etdiyi qalib ssenarilər əsasında "Mozalan" studiyasında süjetlər çəkiləcək və ssenarilərin müəlliflərinə qonorar veriləcək.