Azərbaycan, Bakı, 10 iyun /Trend, müxbir İ.İzzət/
Zığ dairəsi - Heydər Əliyev Beynəlxalq Hava Limanı avtomobil yolunun 13-cü kilometrindən Qala stansiyası istiqamətinə çəkilən yeni yolda son tamamlanma işləri aparılır.
Nəqliyyat Nazirliyi "Azəryolservis" ASC-nin mətbuat xidmətindən Trend-ə verilən məlumata görə, qəsəbələrarası yolların tikintisi üzrə həyata keçirilən layihələrindən biri də Zığ dairəsi - Heydər Əliyev Beynəlxalq Hava Limanı avtomobil yolunun 13-cü kilometrindən Qala stansiyası istiqamətinə yeni yolun tikintisidir.
Nəqliyyat Nazirliyi "Azəryolservis" ASC-in sifarişi ilə yeni salınan yolun uzunluğu 12,5 km, eni isə 21,5 metrdir. Yolun üzərində 11 su ötürücüsü, 3 heyvan keçidi inşa olunub.
Hazırda yolboyu işıq dirəklərinin quraşdırılması,dairələrdə yaşıllıq zolaqlarının salınması, əyrixətli tirlərin vurulması və sair işlər davam etdirilir. Son tamamlanma işlərinin yaxın günlərdə başa çatdırılması planlaşdırılır.
İnşasına 2011-ci ildə başlanılan yolun istifadəyə verilməsi ilə Qala, Şüvəlan və digər qəsəbələrlə paytaxt arasındakı avtomobil yolu xeyli qısalacaq.