Azərbaycan, Bakı, 15 avqust /Trend, müxbir Elmir Murad/
Rusiyadan Bakıya gələn təyyarədən sellofan paketlərdə Azərbaycan Respublikasının aksiz markası olmayan 3 adda, 400 qutu xaricdə istehsal olunan siqaret aşkar olunaraq götürülüb.
Trend Dövlət Gömrük Komitəsinə istinadən xəbər verir ki, Kazan-Bakı aviareysinin sərnişinlərini qarşılayan Azərbaycan vətəndaşı İsaq Fərəcov onlardan sellofan paketlərdə olan malları qəbul edib və arabaya yığıb getmək istəyərkən Hava Nəqliyyatında Baş Gömrük İdarəsinin əməkdaşı tərəfindən saxlanılaraq, mallara gömrük baxışı keçirilib.
Bu zaman İ.Fərəcovun qarşıladığı sərnişinlərdən qəbul etdiyi sellofanlarda qanunsuz şəkildə Azərbaycana gətirilən siqaretlər götürdüyü aşkarlanıb. İzahatında İ.Fərəcov Kazan-Bakı aviareysilə gələn qohumu Elnur Əhədovu qarşılamaq üçün Heydər Əliyev Beynəlxalq Aeroportuna gəldiyini, orada ona göndərilən siqaretləri ayrı-ayrı sərnişinlərdən qəbul etdiyini və həmin siqaretlərin bir hissəsinin şəxsi istifadə məqsədilə, qalanlarının isə hədiyyə olaraq nəzərdə tutulduğunu bildirib.
Faktla bağlı təhqiqat aparılır.