Bakı. Trend:
Argentinanın “Equilibrium Global” analitik portalında 20 Yanvar faciəsi ilə bağlı məqalə dərc olunub.
Trend portala istinadən xəbər verir ki, yanvarın 19-da Argentinanın “Equilibrium Global” analitik portalında “SSRİ-nin dağılması dövründə tarixin yazılması. Bakıda nə baş verib?” başlıqlı məqalə dərc olunub.
Məqalədə bildirilir ki, SSRİ-nin dağılması prosesində Azərbaycanda “Qara Yanvar” kimi tanınan faciə baş verib. 1990-cı ilin yanvar ayında silahlarla təchiz edilmiş sovet qoşunu Qorbaçovun göstərişi ilə Azərbaycan xalqının azadlıq hərəkatını boğmaq məqsədi ilə Bakıya hücum edib. Qeyd olunur ki, Azərbaycan keçmiş Sovet respublikaları arasında müstəqillik uğrunda hərəkatı başlayan ilk ölkə idi.
Məqalədə qeyd olunur ki, 1990-cı ilin yanvar ayında mülki əhaliyə qarşı görünməmiş amansızlıqla qətliamın törədilməsi danılmazdır və nəticədə 100-dən artıq insan öldürülüb, 700-ə yaxın insan ağır yaralanıb. Azərbaycan cəmiyyəti tarixən (indinin özündə də) multietnik xarakterə malikdir, bu səbəbdən ölənlər arasında rus, ukraynalı, yəhudi, ləzgi, tatar və s. millətlərdən olan mülki insanlar da olub.
Daha sonra vurğulanır ki, Sovet qoşunları məqsədlərinə çatmayaraq Bakını tərk etdilər və 1991-ci ilin 18 oktyabrında Azərbaycan öz müstəqilliyini bəyan etdi. Hər il Azərbaycan üçün həssas tarix olan “Qara Yanvar”da ölkələrinin müstəqilliyi uğrunda ən yüksək dəyəri ödəmiş qurbanların xatirəsi ehtiramla yad olunur. Faciəvi tarix kimi anılmasına baxmayaraq, “Qara Yanvar” Azərbaycanın SSRİ-dən müstəqilliyinin qazanılması yolunda bir dönüş nöqtəsidir. Bu, ölkəni müstəqil respublikaya çevirmiş və vətənpərvərlik hissini yüksəltmiş bir hadisədir.