Bakı. Trend:
Avtomat hidroloji stansiyaların aprelin 16-sı ölkə ərazisində əksər çaylarda sululuq artıb.
Bu barədə Trend-ə Suların İstifadəsinə və Mühafizəsinə Dövlət Nəzart Xidmətindən məlumat verilib.
Bildirilib ki, ən çox artım Böyük Qafqaz ərazisindən axan çaylarda qeydə alınıb.
"Belə ki, Böyük Qafqaz ərazisindən axan Vəlvələçayda 49 sm, Qarasuçayda 25 sm, Qımılda 24 sm, Əyriçayda 21 sm, Kiçik Qafqaz ərazisindən axan Əsrikçayda 15 sm, Qarabağ və Şərqi Zəngəzur bölgəsindən axan Quruçayda 29 sm, Oxçuçayda 22 sm, Köndələnçayda 18 sm, Tərtərçay-Vəngdə 9 sm, Tutqunçay və Bəsitçayda 9 sm, Həkəriçayda 4 sm artım qeydə alınıb".
Vurğulanıb ki, transsərhəd çaylarda, Kür-Qıraqkəsəmən məntəqəsində suyun səviyyəsi 40 sm, Araz-Qıvraq məntəqəsində 19 sm, Qanıx-Cəlayir məntəqəsində isə 7 sm artım qeydə alınıb.
"Müşahidə olunan leysan xarakterli intensiv və güclü yağıntılar nəticəsində Şabran rayonu ərazisindən axan Gilgilçay, Quba rayonu ərazisindən axan Qudiyalçay, İsmayıllı rayonu ərazisindən axan Girdimançay, Qəbələ rayonu ərazisindən axan Dəmiraparançay, Ağsu rayonu ərazisindən axan Ağsuçay, Qobustan rayonu ərazisindən axan Pirsaatçay və Samux rayonu ərzasinindən axan Qabırrı çayından sel keçib", - deyə məlumatda qeyd edilib.
Əlavə edilib ki, qeyri-sabit və fasilələrlə yağıntılı hava şəraitinin aprelin 17-dək davam edəcəyi, 16-sı gün ərzində intensiv və güclü yağıntılı olacağı gözlənilir ki, bu da ölkə ərazisinin çaylarında sululuğun yüksək, Böyük və Kiçik Qafqazın, Lənkəran-Astara zonasının bəzi çaylarında sel və daşqın hadisələrinin davam etməsi gözlənilir.