Azərbaycan, Bakı / Trend müxbir K.Z?rbal?yeva/ Budapeşt şəhər məhkəməsinin 13 aprel 2006-cı il tarixli hökmü ilə ömürlük azadlıqdan məhrum edilmiş Azərbaycan Silahlı Qüvvələrinin zabiti Ramil Səfərova qarşı erməni zabiti Qurgen Markaryanın vəkilləri mülki iddia verməyə hazırlaşır. Bu barədə vəkillər Budapeşt Apellyasiya Məhkəməsinin qərarından sonra rəsmi açıqlama veriblər. Zərərçəkmişin vəkilləri R. Səfərovdan 500 min ABŞ dolları məbləğində təzminat istəyəcəklərini bəyan ediblər.
R. Səfərovun ailəsinin məhkəmədəki nümayəndəsi vəkil İkram Şirinov bildirib ki, qarşı tərəfin bu hərəkəti onların bu hadisəyə böyük planın tərkib hissəsi kimi baxmasının göstəricisidir: "Biz ermənilərin bu hərəkətini təsadüf hesab etmirik. Bu, Ramil Səfərovun vəziyyətini yüngülləşdirməyə xidmət edə biləcək hər hansı qərarın qarşısını almaq məqsədilə atılan addımdır". Vəkil hesab edir ki, ermənilər R. Səfərovun gələcəkdə Azərbaycana ekstradisiyası ilə bağlı məsələyə əngəl törətmək üçün indiyədək mülki iddia verməyiblər. Belə ki, mülki iddiya baxılması çox uzun çəkən prosesdir. Bu proses davam etdiyi təqdirdə R. Səfərovun Azərbaycana ekstradisiyası real görünmür.Vəkil bildirib ki, Azərbaycanla Macarıstan arasında hüquqi yardım haqqında müqavilə imzalanmayıb. Buna baxmayaraq hər iki dövlət məhkumların cəzasını çəkməsi üçün öz ölkələrinə verilməsi ilə bağlı Avropa Konvensiyasını imzalayıb. R. Səfərovun da ekstradisiyası bu Konvensiya əsasında mümkün ola bilər.
İ. Şirinov R. Səfərov barəsində Budapeşt Apellyasiya Məhkəməsinin 22 fevral tarixli qərarını alandan sonra Budapeşt Ali Məhkəməsinə kassasiya şikayəti veriləcəyini deyib. Ali Məhkəmə işə ədalətli baxmazsa, vəkil İnsan Haqları üzrə Avropa Məhkəməsinə müraciət olunacağını qeyd edib: "Bütün imkanlar tükənəndən sonra Avropa Məhkəməsinə müraciət oluna bilər. Hələlik Budapeşt Ali Məhkəməsi Ramil Səfərovun işi ilə bağlı qərar verməyib. Ali Məhkəmənin cavabı mənfi olarsa, onda bu məsələ gündəmə gələcək".