Bakı. Trend:
Rio-de-Janeyro Yay Olimpiya Oyunlarında cüdo idman növü üzrə ilk səkkizlikdə yer almış Azərbaycan idmançıları Rüstəm Orucov və Orxan Səfərovun mükafatlandırılma mərasimi keçirilib.
Trend-in məlumatına görə, bunu Gənclər və İdman Nazirliyinin mətbuat katibi Səmayə Məmmədova deyib.
S.Məmmədova bildirib ki, mərasimdə Azərbaycan nümayəndə heyətinin rəhbəri İlham Mədətov, cüdoçular və məşqçilər iştirak ediblər.
İ.Mədətov deyib ki, R.Orucovun medal qazanması digər idmançılar üçün də stimul olub, onlara qələbə əzminin artmasında çox böyük ruh yüksəkliyi verib.
Sonra İ.Mədətov R.Orucova və O.Səfərova Beynəlxalq Olimpiya Komitəsinin (IOC) prezidenti Tomas Bax və Rio-2016 təşkilat komitəsinin sədri Karlos Vuzmanın imzaladığı sertifikatları təqdim edib.
R.Orucova gümüş medal qazanması münasibətilə Azərbaycan nümayəndə heyəti adından xatirə hədiyyəsi də təqdim edilib.
