Bakı. Trend:
Dövlət Sosial Müdafiə Fondunun (DSMF) 2023-cü il büdcəsi haqqında qanun layihəsi ikinci oxunuşda Milli Məclisin plenar iclasına tövsiyə edilib.
Trend-in məlumatına görə, Milli Məclisin İqtisadi siyasət, sənaye və sahibkarlıq komitəsinin noyabrın 22-də keçirilən iclasında Dövlət Sosial Müdafiə Fondunun 2023-cü il büdcəsi haqqında qanun layihəsi müzakirəyə çıxarılıb.
Layihəyə əsasən, ümumilikdə növbəti il Fondun cəmi xərclərinin 6 milyard 263,97 milyon manat məbləğində proqnozlaşdırılır. 2022-ci il üzrə isə bu xərclər 5 milyard 606,27 milyon manat proqnozlaşdırlıb. Növbəti ildə Dövlət Sosial Müdafiə Fondunun xərclərində artım əsasən əmək pensiyalarının maliyyələşdirilməsi (5 907 180 000,0) üzrə proqnozlaşdırılıb ki, bu da əhalinin sosial müdafiəsinin gücləndirilməsi və ilə bağlı dövlət siyasətinin, eləcə də həyata keçirilmiş sığorta ödənişləri qarşılığında öhdəliklərin müvəffəqiyyətlə reallaşdırılması üçün əsaslı maliyyə zəminini formalaşdırır.
Növbəti ildə Fondun xərcləri gəlirlərinə bərabər tutulmaqla cari
ilin təsdiq edilmiş proqnoz göstəricisindən 657,7 mln. manat və ya
11,7%, gözlənilən icrasından isə 927,3 mln. manat və ya 17,4% çox
nəzərdə tutulub.
Müzakirələrdən sonra layihə səsverməyə qoyularaq ikinci oxunuşda
plenar iclasa tövsiyə edilib.