Bakı. Trend:
Logistika dəhlizləri qlobal ərzaq təhlükəsizliyinin əsas elementlərindən biridir.
Trend xəbər verir ki, bunu Bakıda keçirilən 19-cu Azərbaycan Beynəlxalq Kənd Təsərrüfatı Sərgisi və Forumunun ikinci günü çərçivəsində İslam Ərzaq Təhlükəsizliyi Təşkilatının (IFS) baş direktoru Berik Arın deyib.
O vurğulayıb ki, IFS-ə üzv ölkələr ərzaq təminatı səviyyəsinə görə əhəmiyyətli dərəcədə fərqlənir: bəziləri istehlak etdiklərindən daha çox istehsal edir, digərləri isə idxaldan asılıdır ki, bu da effektiv logistika dəhlizlərinin inkişafını son dərəcə vacib edir.
B. Arın Azərbaycanı Orta Dəhliz marşrutları üzərində əsas qovşaq kimi strateji roluna xüsusi diqqət ayıraraq qeyd edib ki, nəqliyyat yolları bu gün yalnız ticarət kanalları deyil, həm də ərzaq təchizatı və regional sabitlik üçün strateji arteriyalardır.
IFS-nin baş direktoru həmçinin üzv ölkələr arasında əlaqələndirmənin gücləndirilməsi, standartların uyğunlaşdırılması və tərəfdaşlar arasında etimadın artırılmasının vacibliyini vurğulayıb.
“Təşkilat ərzaq təhlükəsizliyinin təmin olunması üzrə strateji plan hazırlayır. Bu plan təsdiqin son mərhələsindədir və təchizat zəncirlərinin koordinasiyasını və dayanıqlığını yaxşılaşdırmağa xidmət edir”,- deyə o əlavə edib.
Bundan əlavə, B. Arın məhsullar üzrə inklüziv dəyər zəncirlərinin inkişafının, kənd təsərrüfatında qadınların dəstəklənməsinin, həmçinin məhsul itkilərinin azaldılması, emal, saxlanma və ərzağın daşınması sahəsində proqramların əhəmiyyətini qeyd edib.
