Azərbaycanın yeni sığorta şirkəti 2008-ci ildə liderlərin onluğuna daxil olmaq istəyir
Azərbaycan, Bakı/ Trend , müxbir Ü.İsmayılova/ Azərbaycanın yeni sığorta şirkəti Qarant Sigorta 2008-ci ildə yığımları 5 mln. manata çatdırmaq və Azərbaycan sığorta şirkətləri arasında liderlərin onluğuna girmək niyyətindədir. Bu barədə çərşənbə günü şirkətin idarə heyətinin sədri Vaqif Həsənov məlumat verib. Azərbaycan Maliyyə nazirliyi noyabrın 29-da Qarant Siğorta-ya sığorta fəaliyyəti göstərmək üçün lisenziya verib. Həsənovun sözlərinə görə, şirkət 2008-ci ildə Nizamnamə kapitalını 30 faiz artıraraq, 1.3 mln. manata çatdırmaq niyyətindədir. Mövcud qanunvericiliyə əsasən, fəaliyyət göstərən sığorta şirkətlərinin Nizamnamə kapitalı 700 min, yeni yaradılan şirkətlərin kapitalı isə 1 mln. manatdan az olmamalıdır. Həsənov Nizamnamə kapitalının artırılmasının, sığorta haqqında gözlənilən qanundan asılı olmaqla, ya səhmdarların hesabına, ya da investroların cəlb edilməsi yolu ilə baş verəcəyini bildirib. Qarant Sigorta-nın təsisçiləri ZQAN Holdinq və bir hüquqi şəxsdir.
