Azərbaycan, Bakı, 02 aprel/ Trend , müxbir İ.Xəlilova/ Azərbaycanın Milli Bankı (AMB) ölkənin xarici borclarının qiymətləndirilməsi məqsədilə, qeyri-rezidentlərlə qarşılıqlı borc öhdəliklərinin strukturu və tərkibinin monitorinqini aparıb (real sektor istisna edilməklə). Bu barədə çərşənbə günü AMB-dən məlumat veriblər.
Bu zaman, birbaşa dövlət borcları və dövlət zəmanəti altında borclarla yanaşı, banklar tərəfindən cəlb edilmiş kreditlərin həcmi, bank depozitləri və onların valyutaları və qeyri-bank rezidentindəki depozitlər üzrə öhdəliklər, həmçinin, Milli Bank, Dövlət Neft Fondu və hökumətin xarici hesablardakı aktivləri müəyyən edilib.
Qeyri-rezidentlərlə qarşılıqlı borc münasibətlərinin analizi göstərib ki, son makroiqtisadi tendensiyalar və inkişaf prosesləri nəticəsində, 2007-ci ilin yekunları üzrə qarşılıqlı borcların saldosu $4,3 mlrd. məbləğində profisitlə alınıb. Bu, ölkənin strateji valyuta ehtiyatlarının $2,9 mlrd. artması ilə əlaqədardır. Nəticədə, qeyri-rezidentlərlə qarşılıqlı iddialar üzrə Azərbaycanın öhdəlikləri iki dəfə artaraq $7,9 mlrd. təşkil edib. Bunun 54 faizi AMB-nin qeyri-rezidentlərə tələblərinin payına düşür.
Aparılmış hesablamalara görə, dövlət və bankların xarici borcunun nominal dəyəri $3,7 mlrd. təşkil edib. Bu borcun $2,4 mlrd.-ı dövlət zəmanəti altında cəlb edilmiş birbaşa dövlət və xarici borcların payına düşür.
Diqqətəlayiq faktdır ki, xarici dövlət borcunun ÜDM və strateji valyuta ehtiyatları ilə nisbəti, müvafiq olaraq 8,3 faiz və 33,1 faiz təşkil edib. Belə ki, 2006-cı ildə bu göstəricilər 9,9 faiz (ÜDM-ə nisbətdə) və 45,1 faiz (ehtiyatlara) səviyyəsində olub.
Beynəlxalq normalara görə, xarici borcun xüsusi çəkisi ÜDM-ə nisbətdə 40 faizi ötməməlidir.
2007-ci ilin yekunları üzrə xarici dövlət borcunun mal və xidmətlər ixracına nisbəti 2006-cı ildə 14,1 faizə qarşı 10,8 faiz təşkil edib. Beynəxalq normalar 200 faizdir. Xarici dövlət borcunun xidmət edilməsi üzrə xərclərinin xüsusi çəkisi mal və xidmətlər ixracına nisbətdə, 2006-cı ildə olduğu kimi, ötən il də 0,1 faiz səviyyəsində olub. Maksimal norma 25 faizdir. Lakin, dövlət büdcəsindən bu məqsədlərə xərclər 2006-cı ildə 11,9 faizə qarşı 25,5 faizədək artıb.
Müəlliflə əlaqə saxlamaq üçün elektron ünvan: [email protected]