Azərbaycan, Bakı, 24 aprel / Trend , müxbir U.İsmayılova/ "İqtisadi araşdırmalar mərkəzi" QHT Azərbaycanda ünvanlı sosial yardımın (ÜSY) rəsmiləşdirilməsində "vahid pəncərə" sisteminin tətbiqinə dair təkliflər paketini hökumətə təqdim edəcək. Bu barədə cümə axşamı təşkilatın idarə heyətinin sədr müavini Vüsal Qasımlı bildirib.
"Hazırda üvanlı sosial yardım almaq üçün əhali 21 adda sənəd təqdim etməli olur ki, bu da əlavə problemlər yaradır və çox vaxt aparır", - deyə Qasımlı bildirib.
Azərbaycanda ÜSY 2006-cı il aprelin 16-dan əhalinin ehtiyaclı təbəqəsinə verilir. Maddi yardım altı ay müddətinə verilir. Müddət başa çatdıqdan sonra ödəmə müddətini davam etdirmək üçün bəzi sənədləri yeniləmək lazım gəlir. ÜSY-nın həcmi 2008-ci ldən 45 manat təşkil edir.
Qasımlının sözlərinə görə, təşkilat "Ünvanlı sosial yardım mexanizminə təsir edən amillərin səmərəliliyinin qiymətləndirilməsi" layihəsi çərçivəsində Mingəçevirdə ÜSY alan 800 nəfər arasında sorğu keçirib.
Azərbaycan Əmək və Əhalinin Sosial Müdafiəsi Nazirliyinin nümayəndəsi Babək Hüseynov ÜSY rəsmiləşdirilən zaman ortaya çıxan problemləri şərh edərkən bildirib ki, son vaxtlar ÜSY rəsmiləşdirilən zaman ehtiyacı olanlardan 21 adda deyil, 14 sənəd tələb olunur. Altı aylıq müddət başa çatdıqdan sonra, daha doğrusu ikinci dəfə təqdim edilən zaman yalnız üç sənəd yenilənir.
Müəlliflə əlaqə saxlamaq üçün elektron ünvan : [email protected]
