Azərbaycan, Bakı, 12 may/ Trend , müxbir İ.Xəlilova/ I Azərbaycan-Bavariya iqtisadi forumunda iştirak etmək üçün mayın 14-dən Bavariya İqtisadiyyat, İnfrastruktur, Nəqliyyat və Texnologiyalar Nazirliyinin İqtisadiyyat və istehsalat məkanının marketinqi şöbəsinin direktor müavini Falk Sengerin başçılığı ilə nümayəndə heyətinin Bakıya səfəri başlayır. Bu barədə bazar ertəsi, Alman-Azərbaycan İqtisadi Birliyindən (DAWF) məlumat veriblər. Nümayəndə heyətinin tərkibində 35 Bavariya sahibkarı təmsil olunacaq.
Bavariyanın işgüzar insanları tikinti və infrastruktur, arxitektura, planlaşdırma, şəhər tikintisi, maşınqayırma, enerji və su təchizatı, metal emalı, turizm, ətraf mühitin texniki mühafizəsi və loqistika sahələrində təmsil olunublar.
İqtisadi forum mayın 15-də keçiriləcək. Onun yekunları üzrə sahibkarlar və ekspertlər arasında "Azərbaycanda tikinti sənayesi" mövzusunda dəyirmi masa keçirilməsi nəzərdə tutulub.
Tədbirin təşkilatçısı Alman-Azərbaycan İqtisadi Birliyidir. DAWF-da hesab edirlər ki, Azərbaycan və Almaniya arasında əməkdaşlığa maraq artır və belə tədbirin təşkili tərəfdaşlıq üçün yeni yolların axtarılması və potensial iş imkanlarının müəyyən edilməsi zərurətindən irəli gəlib.
2007-ci ilin yekunlarına əsasən, Azərbaycan və Almaniya arasında xarici ticarət dövriyyəsi 38,3 faiz artaraq, 1,532 mlrd. avro təşkil edib [Müqayisə üçün qeyd edək ki, Almaniya və Gürcüstan arasında ticarət dövriyyəsi 270 mln. avro olub.]
Müəlliflə əlaqə saxlamaq üçün elektron ünvan: [email protected]
