Azərbaycan, Bakı, 28 iyul/ Trend / İranın Milli Dəmir Yolu Şirkəti Azərbaycan, Rusiya və İran arasında "Şimal-Cənub" layihəsi çərçivəsində, Qəzvin - Rəşt - Ənzəli - Astara dəmir yolunun tikintisinə təqribən $108,4 mln. ayırıb. Bu barədə İranın MNA agentlyinin bazar ertəsi yayılan məlumatında bildirilir. Vəsaitin bir hissəsi dövlət büdcəsindən, qalan hissəsi isə, ölkənin ehtiyat neft fondundan ayrılacaq.
"Şimal-Cənub" nəqliyyat dəhlizi layihəsi Rusiya, Azərbaycan və İran vasitəsilə Avropadan Hindistan və Cənub -Şərqi Asiya ölkələrinə vahid dəmir yolu əlaqəsinin yaradılmasını nəzərdə tutur. Layihənin reallaşdırılmasına $400 mln.- dan çox vəsait tələb olunur. İşlərin böyük hissəsi isə, Azərbaycan sərhədinədək dəmir yolu rabitəsinə malik olmayan İranda həyata keçirilməlidir. Azərbaycanda təqribən $35 - 40 mln. vəsaitə müəyyən işlər görmək lazımdır.
Azərbaycanda həyata keçirləcək işlər Astara stansiyasınadək (AR) təqribən 8,5 km yol hissəsi çəkilməsini, təkər cütlüklərinin dəyişmə sisteminə malik stansiyalar, sərhəd və gömrük infrastrukturu yaratmağı nəzərdə tutur. Bundan əlavə, sərhəd dəmir yolu körpüsü tikmək lazımdır. Lakin bu layihənin reallaşdırılması İranla paritet əsasda həyata keçiriləcək.
Birinci mərhələdə bu dəhlizlə 5 mln. ton yükün daşınacağı proqnozlaşdırılır. Sonra isə, bu rəqəm ildə 10 -15 mln. tona çatacaq.