Azərbaycan, Bakı, 24 sentyabr/ Trend , müxbir S.Babayeva/ "2009 - cu ildən Azərbaycanda icbari tibbi sığortanın tətbiqinə başlanıla bilər", - səhiyyə nazirinin müavini Elsevər Ağayev çərşənbə günü bildirib.
2007 - ci ilin dekabrında Azərbaycanın Nazirlər Kabineti yanında İcbari Tibbi Siğorta Agentliyi yaradılıb. İşə götürəndən yığılan bütün vəsaitlər indi paylaşdırılmaq üçün bu qurumda cəmləşdiriləcək.
Nazir müavininin sözlərinə görə, birinci mərhələdə sistemin tətbiqi üçün sınaq rayonu kimi yalnız Siyəzən rayonu seçiləcək. Lakin gələn ildən belə rayonların sayının artırılması ehtimalı istisna edilmir.
Sistemin tətbiqi üçün 2008 - ci ilin dövlət büdcəsindən 4 mln. manat ayrılıb. İcbari sığorta sisteminin yaradılması səhiyyə sahəsində islahatların aparılması, tibb xidmətlərinin keyfiyyətinin yaxşılaşdırılması çərçivəsində həyata keçirilir. Dövlət Sosial Müdafiə Fondunun araşdırmalarına əsasən, hər il ölkədə tibb xidmətinə $200 mln. vəsait sərf olunur. Bu gün yalnız bir sıra birgə müəssisə və şirkətlərdə tibbi sığorta aparılır.
Yeni sistemin tətbiqi ilə tibbi sığorta üzrə xüsusi kartlar veriləcək və tibb xidmətlərinə görə xərclər bu kartlardan çıxılacaq.
Müəlliflə əlaqə saxlamaq üçün elektron ünvan: [email protected]