Azərbaycan, Bakı, 25 sentyabr/ Trend , müxbir İ.Xəlilova/ Avropa Komissiyası 19 mln. avro büdcəsi olan Avropa Qonşuluq Siyasəti (ENP) çərçivəsində, 2007-ci il üzrə indikativ proqramın son variantını Azərbaycan hökumətinə təqdim edib, - Avropa İttifaqının texniki yardım Proqramları (Tacis) koordinasiya bürosunun icraçı direktoru Rüfət Məmmədov cümə axşamı bildirib.
"Proqrama şərhlər olmazsa, biz imzalama proseduruna başlayacağıq", - Məmmədov bildirib.
Maliyyə memorandumu ilin sonunadək imzalanmalıdır və bundan sonra ölkəyə birinci tranş ayrılacaq.
Texniki yardımların vəsaitlərindən üç istiqamətdə istifadə ediləcək - dövlət büdcəsinin sektoral dəstəklənməsi üzrə alət, tvininq - proqram və texniki yardım. Tvininq proqram üzrə təqribən beş layihəyə 6 mln. avronun ayrılması nəzərdə tutulub. Qalan 13 mln. avro (bu vəsaitlərin 10 faizi büdcənin dəstəklənməsi alətinə texniki yardım üçün nəzərdə tutulur) digər iki komponent üçün nəzərdə tutulub. Büdcənin dəstəklənməsi aləti üzrə enerji sektoru seçilib. Büdcənin maliyyələşdirilməsi vasitəsilə energetika sektorunda qanunverici və inzibati islahatların aparılması nəzərdə tutulur.
Vəsaitlər dövlət büdcəsinə üç tranşla köçürüləcək. Memorandumun imzalanmasından sonra 3 mln. avro həcmində birinci tranş köçürüləcək. Növbəti iki tranş Azərbaycanın AI-nin müəyyən etdiyi şərtləri yerinə yetirməsi ilə müşayiət olunacaq. Məmmədovun sözlərinə görə, onlar artıq Azərbaycan tərəfinə təqdim olunub. Aİ Azərbaycana hüquqi və institusional islahatlar keçirməyi təklif edir. Alternativ və bərpa olunan elektrik enerjisi mənbələrinin tənzimlənməsi üzrə Agentliyin yaradılması onların sırasına daxildir.
Hazırda ENP Proqramı çərçivəsində Standartlaşdırma, Metrologiya və Patent üzrə Agentlik, Istehlak bazarına nəzarət üzrə Dövlət Xidməti üçün tvininq-layihələr üzrə texniki tapşırığın hazırlanması gedir. Hər struktura ilkin olaraq 1 mln. avro texniki yardım göstəriləcək.
2007 - 2010- cu illərdə Azərbaycan üçün ENP büdcəsi 92 mln. avro həcmində nəzərdə tutulub.
Müəlliflə əlaqə saxlamaq üçün elektron ünvan: [email protected]
