Azərbaycan, Bakı, 06 oktyabr/ Trend , müxbir Ü.İsmayılova/"Azərbaycanın Şəhərsalma və Arxitektura üzrə Dövlət Komitəsi Bakının yeni Baş Planını hazırlamağa başlayıb", - bazar ertəsi "Xalq"qəzetinə müsahibəsində Komitə rəhbəri Abbas Ələsgərov deyib.
"Yeni Baş Plan şəhərsalma üzrə Avropa ölkələrində qəbul edilmiş sənədlər əsasında hazırlanır", - o bildirib.
Dövlət Komitəsi rəhbərinin sözlərinə görə, bu məqsədlə Böyük Bakının və Abşeron yarımadasının su təchizatı sisteminin inkişafı üzrə Baş Planın hazırlanmasını nəzərdə tutan Dünya Bankının (DB) kiçik şəhərlərin su təchizatı ilə bağlı layihəsi çərçivəsində, Komitə şəhərsalma sahəsində avstriyalı mütəxəssisi dəvət edib.
2007 - ci ilin iyununda DB dəyəri $230 mln.olan kiçik şəhərlərdə su təchizatı və kanalizasiya sisteminin yaxşılaşdırılması layihəsini təsdiq edib. Bu layihə Azərbaycanın 22 rayonunu əhatə edəcək. Onun 2012 - ci ilədək həyata keçirilməsi nəzərdə tutulub.
" Azərbaycanın Şəhərsalma və Arxitektura üzrə Dövlət Komitəsi cari ildə Qax, Qobustan və Naftalanın Baş planlarini hazırlayıb", - Ələsgərov bildirib.
Komitə tikinti şirkətlərinə layihələndirmə mərhələsində verilmək üçün şəhərsalmanın əsasları üzrə normativ sənədlər üzərində işləyir.
"Bütün bu tədbirlər tikinti xaosunun və "tikinti nöqtələri"nin qarşısının alınması məqsədilə görülür", - Komitə rəhbəri əlavə edib.