Azərbaycan, Bakı, 09 oktyabr / Trend , müxbir E.İsmayılov/ Gələn həftə Bakıya Daewoo 211M markalı 70 avtobus gətiriləcək və onlar marşrutlara buraxılacaq. Bu barədə Azərbaycanın nəqliyyat nazirinin müavini Musa Pənahov bildirib.
Azərbaycanın nəqliyyat naziri Ziya Məmmədov əvvəllər Nəqliyyat Nazirliyinin ümumilikdə ilin sonunadək Koreya istehsalı olan 200 Daewoo markalı avtobus əldə edəcəyini bildirib.
İdarə əvvəllər hazırda marşrutlara buraxılan "Man" (Almaniya) və "Maz" (Belarus) markalı 60 sərnişin avtobusu alıb.
İki həftə öncə Nəqliyyat Nazirliyi Bakının mərkəzi küçələrində az tutumlu avtobusların hərəkətinə qadağa qoyub. Bakı ətrafı və mərkəzi küçələrdən kənarda onların hərəkətinə hələ ki, icazə verilir. Proses tədricən həyata keçiriləcək.
"Elmlər Akademiyası" metrosu, Hüseyn Cavid prospekti, "İçəri Həhər" mertosunadək olan ərazilərdə, həmçinin "Azneft" dairəsində və "Neftçilər" prospektində az tutumlu avtobusların hərəkəti qadağan edilib. Lakin bu avtobuslar ikinci dərəcəli marşrut və yollarda istifadə oluna bilər. Nazirlikdən bildiriblər ki, orta və iri tutumlu avtobusların hərəkətinə qadağa qoyulmayıb.
Məqalə müəllifi ilə əlaqə ünvanı:[email protected]