Azərbaycan, Bakı, 29 oktyabr/ Trend , müxbir E.İsmayılov, İ.Xəlilova/ 2009-cu ilin ortalarınadək Bakı-Şamaxı-Muğan avtomobil yolunun yenidən qurulması çərçivəsində Bakı-Şamaxı yolu istifadəyə veriləcək. Bu barədə Azərbaycan nəqliyyat nazirinin müavini Musa Pənahov bildirib.
Yolun uzunluğu 124 km. təşkil edir. Təsdiq edilən layihəyə görə, onun tikintisi 90,11 mln. dollar qiymətləndirilir. Tikinti işlərinə 72,09 mln. dolları Dünya Bankı (DB), 18,02 mln. dollar isə Azərbaycan tərəfi ayıracaq. Nazirlikdə layihənin bahalaşması ilə əlaqədar yeni hesblamalar artıq hazırlanıb, lakin onlar açıqlanmır.
Tikinti işlərinin aparılması üçün İtaliyanın "Todini Costruzioni Generali S.p.A" şirkəti baş podratçı seçilib.
Nazirlikdən bildiriblər ki, layihə çərçivəsində Tovuz dairəvi yolunun tikintisi nəzərdə tutulur. Bununla əlaqədar hazırda yolun keçdiyi ərazilərdə yaşayan əhali köçürülür. Yolun tikintisi 7,2 km təşkil edir, 3,3 km üzrə işlər artıq həyata keçirilib.
Bakı-Şamaxı-Muğan yolu, Bakını respublikanın qərb rayonları ilə bağlayacaq.
Layihədə əsas məqsəd nəqliyyat xərclərinin azaldılması və istifadə, tranzit imkanlarının artırılması, həmçinin Azərbaycanın şərq-qərb dəhlizi üzrə keçid üçün yol təhlükəsizliyinin təmin edilməsindən ibarətdir.
Bu yol layihəsi 2006-cı il yanvarın 17-də DB-nin Direktorlar Şurasında təsdiq edilib. Kredit vəsaitləri Beynəlxalq Yenidənqurma və İnkişaf Bankının şərtləri əsasında verilib: dörd il güzəştli dövr və libor+0,5 faiz dərcəsi ilə ilə 20 il müddətinə.
Layihənin məsləhətçisi Finlandiyanın "Finroad" şirkətidir.
Məqalə müəllifi ilə əlaqə ünvanı - [email protected]
