Azərbaycan, Bakı, 20 noyabr/ Trend , müxbir Ü.İsmayılova/ Gunay Anadolu Sigorta Azərbaycan - Türkiyə birgə sığorta şirkətində rəhbərlik dəyişib.
"Mən öz vəzifəmi iki həftə əvvəl tərk etmişəm və artıq digər sığorta şirkətinin- Baki Sigorta - nın İdarə Heyətinin sədri vəzifəsinə dəvət edilmişəm", - şirkətin keçmiş Baş direktoru Mehman Əliyev cümə axşamı bildirib.
Gunay Anadolu Sigorta şirkətinin aktuarı İsgəndər İsgəndərovun sözlərinə görə, şirkətin Baş direktoru vəzifəsinə əmlakın yanğından sığortası şöbəsinin rəhbəri Vüqar Rəcəbov təyin edilib.
2007- ci ildən bazarda fəaliyyət göstərən və indiyədək təsdiq edilmiş İdarə Heyəti sədri olmayan Baki Sigorta sığorta şirkəti ilə əlaqə saxlamaq mümkün olmayıb.
1992 - ci ildən fəaliyyət göstərən Gunay Anadolu Sigorta-nın təsisçiləri Gunay Səhmdar Bankı və Türkiyənin Anadolu Anonim sığorta şirkətidir. Şirkətin Nizamnamə kapitalı 806 min manatdır.
Baki Sigorta ASC Bank Respublikanın Tural Sigorta sığorta şirkətinin səhm - nəzarət paketini (səhmlərin 50 faizdən çoxu) alması yolu ilə yaradılıb. Yenilənmiş şirkətin səhmlərinin qalan hissəsi fiziki şəxslər arasında bölünüb. Azərbaycanın ən iri banklarından biri Bank Respublika şirkətin təsisçilərindəndir. Baki Sigorta-nın Nizamnamə kapitalı 1,4 mln. manat təşkil edir.
Noyabrın 20 - nə olan cari mübadilə məzənnəsi -- 0,8104 AZN/USD.
Müəlliflə əlaqə saxlamaq üçün elektron ünvan: [email protected]
