Azərbaycan, Bakı, 02 dekabr / Trend , müxbir N.İsmayılova/ Azərbaycanda "quş qripi"nə qarşı mübarizə layihəsinin realizəsi üzrə monitorinq aparmaq üçün Dünya Bankının baş mütəxəssisi Brayan Bedard Bakıdadır, - çərşənbə axşamı DB-nın Bakı nümayəndəliyində deyiblər.
"Missiya xülasə xarakteri daşıyır və dekabrın 5-dək layihənin realizəsinin gedişilə tanışlıq üçün ölkədə olacaq", - nümayəndəlikdən bildiriblər.
Bu layihəyə DB "Azərbaycanda tikintinin institutlaşmasına texniki yardım" (IBTA-2) üçün istifadə olunmamış qalan 3,56 mln. SDR məbləğində (5,145 mln. dollardan çox) kreditin vəsaitlərini yönəldib.
DB-nin layihəsi çərçivəsində laboratoriyalar üçün reogentlərin alınması, onların maddi-texniki bazalarının möhkəmləndirilməsi, ixtisaslaşmış qurğuların alınması nəzərdə tutulur. Hazırda laboratoriyalar büdcə vəsaitləri hesabına alınmış qurğularla təchiz olunub və indiki anda təcili tədqiqatlar aparmağa qadir. Layihə çərçivəsində həmin qurğuların fəaliyyəti mükəmməlləşdiriləcək.
Layihənin ikinci hissəsi Baytarlıq Xidmətinin potensialının möhkəmləndirilməsini (xidmətin və onun regional ofislərinin maddi-texniki təminatı, personalın treninqi) nəzərdə tutur. Layihə qismən Səhiyyə Nazirliyinin laboratoriyalarının təchizatını, qurğuların alınmasını və treninqlər aparılmasını da əhatə edir.
Azərbaycanda "quş qripi" təhlükəsilə bağlı monitorinqlər müntəzəm keçirilir, bu il növbəti monitorinq dekabrın 15-də başlayacaq.
Monitorinq Abşeron yarımadasını və ona yaxın əraziləri, Xəzərsahili zolağa daxil olan Dəvəçi, Salyan, Ağcabədi, Lənkəran bölgələrini əhatə edəcək və Səhiyyə, Kənd Təsərrüfatı, Ekologiya və Təbii Sərvətlər nazirliklərinin nümayəndələrindən və Ovçular Cəmiyyəti üzvlərindən ibarət xüsusi işçi qrup tərəfindən keçiriləcək.
Bütövlükdə bu il keçirilən beş monitorinqdə vəhşi quşlardan və ev quşlarından 8 mindən artıq qan və patoloji material nümunəsi götürülüb.
Ötən il Dövlət Baytarlıq Xidmətinin keçirdiyi 12 monitorinq zamanı 8 min vəhşi quş və ev quşu müayinə olunub. Onların heç birində virus aşkar olunmayıb.
Müəlliflə əlaqə ünvanı: [email protected]
