Azərbaycan, Bakı, 12 dekabr/ Trend , müxbir S.Babayeva/ Azərbaycanda ən iri sement istehsalçısı Garadagh Cement 2008-ci ili, əvvəlki ildə olduğu kimi, 1,3 mln. ton məhsul istehsalı həcmi ilə bitirməyi planlaşdırır, - şirkətdən cümə günü bildiriblər.
"Müəssisə adi rejimdə işləyir. Qlobal böhranın nəticəsi kimi zavodun bağlanılması ehtimalının isə, heç bir əsası yoxdur", - Garadagh -dan deyiblər.
2008- ci ilin sonuna yerli bazarda Garadagh Cement-in bazar payı 35 faiz təşkil edəcək.
Bu gün zavodda illik gücü 1,7 mln. ton sementə bərabər olan yeni sobanın tikintisi üzrə fəal iş aparılır.
"Bu, Azərbaycan bazarına keyfiyyətli sement tədarükünü davam etdirməyə, ən yaxşı ekoloji standart göstəricilərinə uyğun olmağa imkan verəcək", - şirkətdən qeyd ediblər.
2011- ci ildə Garadagh Cement artıq sementi yeni soba vasitəsilə istehsal edəcək, - şirkətin rəhbəri Xoria Adrian əvvəllər bildirib.
Garadagh Cement-in əsas səhmdarı Holcim Group-un Direktorlar Şurası ötən ilin sentyabrında zavodun müasirləşdirilməsi layihəsini təsdiqləyib. Layihənin dəyəri 300 mln. avrodur. Holcim Group layihə üçün sərmayələrin böyük hissəsini öz üzərinə götürəcək.
İsveçrənin Holcim şirkəti 1999-cu ildə Garadagh Cement-i özəlləşdirib. Garadagh Cement-in səhmlərinin 69,4 faizi Holcim-ə, 10 faizi Avropa Yenidənqurma və İnkişaf Bankına (AYİB), 10,6 faizi kiçik səhmdarlara, 10 faizi Azərbaycan İnvestisiya Şirkətinə məxsusdur.
Müəlliflə əlaqə saxlamaq üçün elektron ünvan: [email protected]
